المساعد الشخصي الرقمي

مشاهدة النسخة كاملة : مكتبة شعراء الطمبور


رشاد العجب
01-19-2009, 10:06 AM
1-الشاعر الفاتح ابراهيم بشير

الطمبور صديقنا و عزنا و ملجانا

وكتين السنين تفتح بوابة أحزانة

مما قمنا نسمع فيهو لا ملينا لا ملانة

زي إبل الرحيل شايلي السٌقا و عطشانة

أوتارو الحنيني تملِّي عايشي معانا

في الريف و الحضر و محل ما تمشي خطانا

الله لو بشيشي تداعبو إيد فنانة

تتراقص جميع الدنيا بي أركانة

لو قلبك حجر و غنانا شايفو رطانة

أول ما يرن تلقاك طربتا معانا

إحساسك يذوب قامتك تميل طربانة

زي مرّ النسيم وكتين يداعب البانة

الطمبور سماحتو القمرة مالي سمانا

الليل و السكون و الرملة كالمرجانة

نتلملم نكون في شلة زاهية الوانا

نضحك ننبسط لما الصباح يلقانا

وفي رواية اخرا معروف من قديم

انو الجمال نسبي وللموجب دوام لابد من سبي

لاكن نتفق رسمي وكمان شعبي الطمبور علاج ليكل مرض عصبي

رشاد العجب
01-19-2009, 10:09 AM
الشاعر الفاتح ابراهيم بشير
************
في لحظة من عمر الزمان...والناس تكابِسْ في الجسور
مشغولة بي بحر التساب ... لو فاض يلخْبِط للأمور
المَسْرَة تصبح بينَ بين...أو بالأصح بتضيع كسور
ما أصلو هو الدَّيَّانا ديل ...واقفين على الباب من شهور

خايفين حقيقي من البحر...يسرق حنين الأمسيات
وتغرق شتيلاتنا الخُدُر ...وترحل معاها الأمنيات
والحِلِّي تغرق في الأسى ...وسكانها يصبحوا في شتات
في شان دا كل الناس بقت ...طورية في إيد الجِنَات
وكل البلد نزلت تِحِتْ ...أطفال . نساء . شيوخ. بنات
بس فجأة جاهُن صوت بكي ...وصراخ غريب في ذبذبات
قام سألوا هوي حاصل شنو...السيل وراكم يا جِنات؟
يا أخوانا إنكسر الجُسُر؟...كان ردهم لا .. لا .. بتات
يا أهلنا حسن الدابي مات ...يا أخوانا حسن الدابي مات
وقعت متاريس الصبُر ...وانهدَّ كتف الأغنيات
وغرقت مداينك يا شعر ...واللحن إلتزم السُكات
ورحلت معاني الأمنية ...وجرت الدميعات كالفُرات
ياحليلو كان جبل ابن عوف ...ثابت على المبدأ ثبات

أسطورة ختَّاها الزمن ...زي واحة في الدرب السُخُن
الدابي يا سمح الخُلُق ...الدابي يا الكُلَّكْ حُسُن
في يوم رحيلك يا تِلِبْ ...ناحت بلدنا رُكُن ,, رُكُن
الحسرة عانقت القرى ...الدمعة فاضت في المدن
النخلة تبكي بكي السواد ...هَدَّت علي لوزة القطن
وكان الحصاد آخر السنة ...شوال تمُر وشوال حُزُن
كان الحصاد آخر السنة ...قنطار حُزُن وقنطار قطن
حتى المطر يومو النَّزَلْ ...ضاف فوق حُزُنَّا قدُر تُمُن
ماشفنا زيّها في الشمال ...لا بالنظر لا بالأُذُن
القيفة قالدت الجرف ...الموجة نطَّت في غُبُنْ
حلفت تكسِّر للجسور ...تيارها يدخل كل شُكُنْ
قُنَّالا نغرق كُلَّنَا ...يا موجة نغرق كلنا
يرضيكي نغرق كلنا ...الموجة قالت فليكُن
مادام أمير الشعراء مات ...ما في اي داعي تلد بطُنْ

يا موجة جد قولك صحيح ...كان حقو نغرق كلنا
ما الدابي كان زي الهواء ...فينا ومعانا وحولنا
الدابي كان مضجع أمين ...كان ياهو شدرة ضُلنا
الدابي كان عنوان عريض ...في صفحة الفن والغُنا
إنسان وفنان مكتمل ...زي وصفو قاسي عليْ أنا
مهما أقول أنا شن بقول ...لو صرت أكتب كم سنة
تلقاني في الآخر بقيف ...وأنادي في نُصْ الونى
الدابي أكبر بي كتير ...الدابي زي خاتم المنى
وأكبر من القول والقصيد ...ومن غنوة جايي ملحَّنة

الدابي كان ومضة أمل ...والدابي كان شعرة وشي
الدابي كان مشوار طويل ...ما مَلَّتُوا الناس في المشي
الدابي كان غيمة وفا ...تنزل صباح ومع العِشِي
الدابي كان زي الصباح ...وكتين يلاقيكك منتشي
الدابي كان ياهو الصديق ...الدابي كان جد كل شي
مهما أقول أنا فيهو قول ...أشعاري تخجل وتختشي

الدابي كان زي المحيط ...كضاب يقول زول حدَّدو
دائماً يلاقيك بي جديد ...الدابي قاسي نفَنِّدو
الدابي كان حادي الشعر... ياهو البِدِّلُّو ويرشدو
الدابي كان تيار فرح ...يقلع حُزُنَّا ويطردو
الدابي كان موال جميل ...دائماً نغني نرددو
ولو قُتَّ هسع وللصباح ...أنا حُسْنُو قاسي أعددو

الدابي كان رمز الغبش ...مابيعرف الزيف والنفاق
حبوه كل الكادحين ... شالوهو في الهمس الدُقاق
يوم طقَّ إضنينا الخبر...بكت ((أم جواسير)) يا رِفاق
النخلة حَتَّتْ مُشْرِقا ...ودخلت مع الطين في عناق
وإعلامنا ما جايب خبر ...يبقى لي ما هامِّي الفراق
معليش يموتوا كَدِي الغبش ... وما ننسى شكراً للوفاق
مع إنو حسن الدابي كان ...علماً يرفرف في الوطن
مع إنو حسن الدابي كان ... سوميتة في جيد الزمن
مع إنو حسن الدابي كان ...صابونة للزمن الدرن
مع إنو حسن الدابي كان ...زي قمرة في الليل الدُجَن
وما بتتعرف قيمة القمر ...لي زول حِدا البندر سكن
الدابي كان قبلة بلد ... وميراث ثقافي بلا تَمَن
كان مأوى لي عابر السبيل ...أجواد متل غيم المُزَن
يا ما دخلنا عليهو ليل ...قُبَّال سلامنا يجي الصحن
يحضنَّا أول بالعيون ...من ثم يحضن بالبدن
يتنحنح الشيخ الوقور ...يضحك لو ضحكة بلا اللبن
ويقول حبابكم يا شباب ... جيتوني في الموعد إذن
دا الدابي يا أهلي الحُنان ... أسطورة ختَّاها الزمن
الدابي كان زولاً حكيم ... ما بيعبأ باليحصل غداً
الدابي كان لِمِّيحْ ذكي ... يعرف متين يرخي الرسن
صدق اللي إختار لو الإسم ...وأطلق عليه اسم الحسن
الدابي كان كوم أغنيات ...مكتوبة بي دمع الشجن
ألحانها وشوشة النسيم ...وأطيار تزقزق في الفنن
إيقاعها كان موية الحفير ...وقَرَّاع حميم للحوض عَطَنْ
الكورَسْ الشتل الدُقَاق ...قمرية قُوقَتْ في حَزَن
فنانها كان نخل الفريق ...وصوت السبيطي مع الكُعَن
دا الدابي يا أهلي الحُنان ...أسطورة ختاها الزمن

تامِنْ عجائب الدنيا هو ...لولاه فنَّنَا ما نهض
وأصبح حديث الناس عموم ...ولي حجة النقاد دحض
دا لأنو كان ياهو الدليل ...عن شورة أبداً ما عَرَض
أمَّنْ لنا الدرب الطويل ...وبي شعرو طنبورنا انتفض
آخر وصاياهو العزيز ...وهو طريح يعاني من المرض
وصَّانا قال :
يا ولادي دايركم دوام ...تتحدوا تبقوا مع بعض
الراية لا تسقط بتات ...لو حتى ظرفكم اعترض
قلنا لو أبشر يا الأبو ...يِتْقَدَّ طرفنا لو غمض
نحن وولادك وكلنا ... بنشيلها رايتك دون مضض
لكن محال زيك نكون ... أو حتى ليك نبقى العوض

دا الدابي يا أهلي الحُنان ... أسطورة ختاها الزمن
صح يا هو أبو الفن الرفيع ...وملجانا في ساعة المحن
حَضَنْ المواهب وفرَّقها ... الليلة صوتها ملأ الوطن
يا الله تدِّي قَدُر عطا ... ومأواه يبقى جنان عدن
يا الله تدِّي قَدُر عطا ... ومأواه يبقى جنان عدن

رشاد العجب
01-19-2009, 10:11 AM
الشاعر الفاتح ابراهيم بشير
*************
القرير إحساسنا بيهو ... مستحيل توفي القوافي
طالما النيل شان عيونو .. انحنى وقطع الفيافي
ياهو عاد عزة نفوسنا ... وساحة الكرم الخرافي
ويوم تتوه في اليم سفنا ... غيرو وين نلقى المرافئ
ياما اتعلمنا منو ... كيف يكون معنى التصافي
في زمن فيهو التسامح ... أضحى بين خلق الله مافي

شوف قرير أهلي الأفاضل ... ليل نهار في العزة رافل
فيهو مطبوع سر إلهي ... بدري كان تحلم بو بابل
حاضنو هو النيل بي محنة ... بس عشانو هو جانا مايل
انحنى وغيَّر مسارو ... ولفة أب حمد الدلائل
كل منابع الطيبة فيهو ... نال بهن أعلى المنازل
بالشعر محفوظ مخلّد ... في دواوين الأوائل
اليطوف هيبة ربوعو ... يستفيد لو يبقى ماهل
يا يشمَّ لو نسمة عابري ...ماخدي اريجا من الخمايل
ويا ملَكْ وجدانو منظر ...يبتر الهم والبهادل
والرسول قال في حديثو ... ومافي أصدق منو قائل
الخدار والموية جنبو... بلسم الهم والمشاكل
ويا سمع لو قصيدة صادقة ... ترسل الأشواق قوافل
ويا نغيم طنبور حِنيِّن ...يستقر جوة الدواخل
ويا قِميريةً تَقُوقِي ...فوق ِتِميرا سَبِيطَا شايل
ويا قَعَد بي ايدينو يَشْرب ...موية صافي من الجداول
والحفير مَكَنَاتُو تنهر ...ليل نهار إصطافو عامل
ويا يشوف لو كمان مزارع ...شايل الطورييِّ نازل
بي نشاط قاصد زراعتو...والصعب بيشوفو ساهل
ويا كمان متَّع عيونو ...بي حسان زي الأرايل
ذوق . طيبة . أدب خيالي ...في عفاف ما مِنُّو نايل
يا كمان لاقوهو أهلنا ...بي كرم من غير مقابل
ورُّوا إنو الدنيا لسَّع ...فيها خير وأنبل خصائل
يكرموك لو جيتَ فوقُن ...يجبروك إن ماكا نازل
مؤمنين بي إنو باكر ...كلْ نعيم الدنيا زائل
ديل أهلنا بدون مبالغة ... جاهلُن يَوْزِن قبائل
دا القرير يا الدار تشوفو ...بالنهار والفيهو حاصل
أما في وكت الأماسي ... ليلو ضُمَّة جميل وحافل
نِتَّفِق من بدري شُلَّة ... ونطلع القيزان قوافل
فيها يِتْجَمَّعْ شَمِلْنَا ... في رباط زي العوائل
ونبدأ نسأل عن بَعَضْنَا ... يا مُحُمَّدْ وينو كامل
شوفوا يا ناس وين سيد أحمد...أصلو زولاً ديمة ماهل
يمسك الطنبور يَنَقْرِشْ ...لحن تِنْهَار بُو المفاصل
ونحن في عزة قعادنا ...يبدأ واحد دار يجادل
بي محنَّة نقول لو ياخي ...يا عماد خليكا عاقل
خلّنا النسمع معاكا ...إشتهيت بس هسي كامل
ويا فلان قول لك قصيدة ...تروى أيامنا القواحل
جاي من وجدانو صادقة ...ليها تهتز الجنادل
وفي الختام نطرب نغني ...وما بِنعْرف قيل وقائل
دا القرير يا الدار تشوفو ...رغم وصفي أنا ما هو كامل
دا الكمال لله وحدو ...اللاَّ بينوم لا بتلقى غافل

رشاد العجب
01-19-2009, 10:14 AM
الشاعر الفاتح ابراهيم بشير
*************
معروف من قديم انو الجمال نسبي
وللموجب دوام لابد من سلبي
لكن نتفق رسمي وكمان شعبي
الطمبور علاج لكل مرض عصبي
سبحان الاله خالق العباد ربي
سوا قدح حراز دكا راصي العربي
مكسي جلد بقر ومطلي وتقول دهبي
وفوقو تلات عصي واقفات بلا شعبي
وخمسه سلوك حنان موزونه بالنسبي
لو رنة تزوب ترقص جبال كجبي
البركل يمر يتحول العقبي
لو ما كت بخاف والناس تشيل كضبي
كت بقول يرن وتتحل لوكربي
اندح الوئام بين الخلق يدبي
والبوسني الجريح يستئمن الصربي
بالطمبور دوام يتلاشي كل سلبي
وينشرا الفرح من كايا لا اوربي

رشاد العجب
01-19-2009, 10:16 AM
الشاعر الفاتح ابراهيم بشير
*************
قبــــلة غُنـــاي


احتـرت كيفـن اوصفـك .. والله يـا قبـلـة غـنـاي
لو كان بحور الكون مـداد بتجـف قبـل مـا تنصفـك

حاولت اكتب ليك واقول واوصف ملامحـك بالشعـر
لكن حروفي تـذوب عديـل قـدام عيونـك تنصهـر
يا عايشة في دمي وغناي يـا ديـدن الـروح والفكـر
خلدت اسمك بي حروف قطرات دماي كانـت حبـر

يا غنوة في وتري الحزين يا ضحكة في الزمن الصعب
يا واحة في عز الهجير يا راحـة مـن بعـد التعـب
يا نسمة هبت في الدغيش عزفت علي وتـر العصـب
يا رحمة من رب العباد مكبوبة فـوق خلـق الله كـب

سافرت في عينيك سنيـن زادي المعـاي ابيـات غنـا
مكتوبة بي دمي الصبـح شـلال مـن الهـم والعنـا
صورت احساسي الدفيـن بـي قافيـة ليـك معنونـة
بتقول بلا كلفة ورتوش يا انتـي يـا المـوت والفنـا

احترت في وصفك انا وحارت معاي كـل الحـروف
مرات بشوفك يا مناي ياقوتـة فـي قلبـي الولـوف
مرات بشوفك ضي امل دبج خطاي رغـم الظـروف
مرات بشوفك جارية نيل امواجو عانقـت الجـروف

رشاد العجب
01-19-2009, 10:24 AM
2/الشاعر خالد شقوري
*************
طفت اطراف الفيافي
شلت صبحي وليلي حافي
مانسيت ارد القوافي
زي طعم صبريه مافي
زي عشم صبريه مافي
زي نغم صبريه مافي
شافعي من عربان بلدنا منها وفيها الوداعه
شتله في قيزان بلدنا قايمي بايده وضراعه
القديم اللافه طرقي زاهي في روعة طباعه
البسيمات في وجيها الباهي من زمن الرضاعه
فاقعي زي شمس العصاري في العمر باقي له ساعه
في القليب الشايله صافي زي صفا صبريه مافي
في الهجير راحت تدقق في النهارالحار تورق
للهدوم بالليل تلتق ....
في الجرف زارعه له حوض راجي قبل الحين يبتق
والبسالمه من بلدنا هي تقولو انشالله عافي
زي كلام صبريه مافي وزي سلام صبريه مافي
في كريقة خاله احمد شايله ليله وايده تنبح
شوكي لاقته في دريبه لما كان بالمعز تسرح
نامت المسكيني تقنت والفوينيس زادو روح
باقي تمتمه في خشيمه تسال الله المسره تنجح
ماله مال المسره الا شان حبيب روحه يفرح
دي البنيه الريده وافي زي غرام صبريه مافي
زي شعور صبريه مافي زي غرام صبريه مافي
رادت الناس السمر رادت الصفا والعكر
رادت الموج الهدر ..........
ردات الحله وبيوته
في عيون صبريه طلت ريدة الخلا للبحر
نافري من قيلة الكرارق وخايفي من قولة السفر
والرحيل السرو خافي في قلب صبريه مافي
في زمن صبريه مافي وفي خيال صبريه مافي
والنهايه المن فصول سيرة البنيه
لما عادت للبيوت الكانو قبل المغربيه
مالقت غير الزوامل شايله احلام الصبيه
شايلي عيدان الكرراق في الصباحات والعشيه
ضاربي بطن الوادي زفه لمت الناس والسعيه
والمطيره الضاربي قبلي لاقت الدمعه العصيه
والرحيل عز البوداي الرحيل وجع البنيه
زي رحيل صبريه مافي ِ
زي سفر صبريه مافي
زي حلم صبريه مافي

رشاد العجب
01-19-2009, 10:27 AM
الشاعر خالد شقوري
*************
ضمه جسم الليل عويله وضمت الاهات زليله
حوا ياناس ياحليله وثاني ياناس ياحليله
ماسكي كف الثوب تخيط والدموع تنزل هميله
كان متاكي الباب وخايفي من ابوها يشوف حويله
مالعليهو هو ماهو هين كيف تعل روحو العليله
كان يقول لها حوا مالك والعذاب كيفن مشى لك
حوا لا تزيدي العليكي فوق كتيفي انا شايلو فالك
حوا ماهميني حالي الا بس هاميني حالك
حو ا حوا باقي نصبر ونحبس العبر الثقيله
حوا برد الدنيا اكبر والله اكبر من عغتاها
كان بامكانه تسرق بس ضمير الخير حماها
زاد ازاها وزاد شقاها لمه ابوها الراجيه ودع
وروحو دقت بوغ رحيله
حوا قالت داير تاكل لو لقت لها لقمه نيه
قالوا ليها ان دايري تاكلي اكلي في خاطرك شويه
اضحكيلم وابسميلم تلقي بدل القمه ميه
حوا قالت دايره تغمر لو حلم بالفرحه طافه
قالو ليها الدايري تغمر الا في صدر السخافه
بينا وبين عيشة المعزه ماخلاص بعدت مسافه
حتى قدر الموت اباها مش حرام الموت ياعافا
سوت الشاي للعطالي ماجنت غير الرزاله
حامت الحلات تغسل شالو ناس الحله حاله
مدت الايد للعمايه ختو في ايدينه لالا
قنبت في ضل مصغر سارحة تلتق في نعالة
في ضجيج عجلات زمانه مانست صرخة جماله
حوا ماتت لمه ماتت امها وكانت طفيله
ماتت لمه ابوها روحو دقت بوغ رحيله
وماتت الف مره لمه سلبوها الفضيله

رشاد العجب
01-19-2009, 10:28 AM
الشاعر خالد شقوري
*************
وقفت بعد حلبت لبينة الشاي تكورك يا الحسن
يا ام الحسن وينو الحسن
لمن صفت رغوة شخيبات اللبن
في حلتا المبني من طبق السكن
واقفي في حوش البهايم ولسع تكورك يا الحسن
جاها حسا من بعيد مارق من القاطوع ورا
قال ليها خير يا الحاجي خير
قالتلو خير تعال لي جاي دايراك تعنون لي جواب
يا الراسي لي ولدي الخدير
لا تبقي زي شافع السرير يقول لي زين آيمة زين
وزين تبقي بعد شهير
وان جاني يكتب فد سطير
اقولو يا سجم السجم انا زي قرايتك ما قريت
لكن عويناتي بيفرزن الوريقة البيضاء من لون القلم
بعد المغيرب بي شوي جاها الحسن تعبان يسير
دا العشى غنمو من الدرب سرقت ندي وشو الهجير
سوتلو شايا بي لبن قرض معاهو حرف فطير
قالتلو بسم الله قول واكتب وصيتي انا للخدير
الزمن يا ولدي ماحقاهو السنين
البعيش في الدنيا ما بعيش مرتين
العمير فاضلي بس منو اليقين
وانت طول في البنادر يا الحبيب لا متين
تعال اوريك حق ابوك الجم حقيق حاج اللمين
ان عرفتو بلا عمار يقولو ولدا عندو طين
العلاج لا تنسي رسلو لي دحين
العوينات آجناي شوفن ضنين
سلامنا ليك مطرز للبنيات والبنين
ولو الارض يا ولدي تنشال في الايدين
انا كت برسلا ليكا في لوري الخزين .

رشاد العجب
01-19-2009, 10:31 AM
الشاعر خالد شقوري
*************
لما نبكى من المواجع قلنا نرتاح فى بكانا
قولى كيف نرتاح ونحن نبكى من شدة هوانا
الليلة رحلة الأشواق بعيدة والشواطئ بعيد مكانه
حتى فى بر الأمانى السنين هدت قوانا
كنا نحلم بمداين فيها نرتاح من شقانا
قولى كيف نرتاح ونحن نبكي من شدة هوانا
القدر طاوع قلوبنا وخلى بحر الريد حدانا
ونحن ماصدقنا قمنا نشرب فوق روانا
دى المشاعر فينا فاضت غرقت فرحة صبانا
ما النعم مرات بتشقى والله بالريد إبتلانا
مرة طلت دارنا غيمة ونحن ياما الريد غشانا
شايلة فى الخاطر محنة جات تعيش الريد معانا
جات تصب فى الريدة ريدة لو قليل يبرد جوانا
كيف يا غيمة نرتاح ونحن غلبنا فى هوانا
ما غريبة على البريدو يلقوا فى الريده المهانة
ياما كتير أحبه غرقوا فى بحور الذل عشانا
فى الحقيقة الريدة مره ضقنا مرها فى غنانا
ماهو قيس بكى من هواهو مانحن برضوا الريد أذانا
يا زمن لو تصفى نصفى فى البوادى يعم صفانا
والعيون تصبح مرافئ فيها نرتاح من عنانا
رحلة الهم بينا طالت ملت التسيار خطانا
نعمل آيه ما نحن غلبنا فى هوانا .

رشاد العجب
01-19-2009, 10:32 AM
الشاعر خالد شقوري
*************
انكسرت جسور الدمعه واندلقت منابع احزانـــه
الله لقلوب مكلومه يوم خبر السواد الجانـــــا
ادمنت العيون الدمعه متوالى الجفون مليانــــه
اغرقت الخدود بى سيله طبعت فى الوجوه اشجانـه
الله من مرارة الفرقه وآه أنا من جحيم احزانـــه
سدت فى الحلوق العبرة لامن بالنويح شرقانـــه
القدر اللعين فاجعنا لفح الفرحه مــــــن تالانا
خلى صبرنا عاضى الجمرة تأكل فى الهشيم جـوانا
الحزن الدخل اعماقنا باقى الى الازل فى حشــانا
لا نوحنا وبكانا يزيلو لابتغسل دموعوا اســــانا
تقودنا خطانا نحو اجلنا مو معروف محل مرســانا
يبرانا الممات وين نمشى شقيش ما نسوقه خطــانا
الدنيا العبوس ملعونه اوعك من تنوم فى امانــــه
ترميلك ضليل خداعه ضامرى وراء مقيلو خيانــه
تتفتح زهور فى روضه تجزب للفراش بالونـــه
من قبل الثمار تتحت قبال ما تجف اغصانــــه
أه أنا من نضارة ورده حين طل المحل بستانـــه
ما إتمهلت تفوح طيبه تبرز للزمان الوانـــــه
وأه أنا من سكيل الوالده وكتين ترسى اعز بطانـه
تفتش فى الخلق كايسالو بيناتن بلا الضهبانــــه

رشاد العجب
01-19-2009, 10:37 AM
الشاعر خالد شقوري
*************
يلا نسافر فوق الكلمة نشيل الزاد احلام وردية
نحكي حكاية الزول القيمة الزول العاش للخاطر الحية

عاهد نفسو ببذل الروح علم كيف العزة تكون
شال امالو كتاب مفتوح مشروح وتروح من بينو قضية


كان مكتوب في اول صفحة وطن مزروع حنيه وقمحة
ومدن مصقولة عوالم سمحة وناس بتعرف الناس من لمحة


كان مكتوب في الصفحة التانية طفلة تقالد الغيمة الحانية
ونخلة بتهدي قطوف الدانية وهاك البلد الغالي هدية


اغنية فيها تلاتة مقاطع مقطع شال لون الدوبيت
ومقطع شال نفس الجراري ومقطع طالع من قمرية

كان مكتوب في الصفحة الرابعة طالب بيقراء وعيونو متابعه
خريطة البلد العالي الغالي وموية النيل المنها نابعة


وعز موصول للصفحة الرابعة وشوق موصول للصفحة المية


يلا نسافر فوق الكلمة نشيل الزاد احــــــــــلام وردية
ونحكي حكاية الزول القــــــــــــــيمة الزول العاش للخاطر الحيه

رشاد العجب
01-19-2009, 10:38 AM
عاشق عيونك كم سنه معليش خلاص غلطان أنا
مشيت على دربك سنين افرش دريبك بالمنى
سرحت فى واديك زمن ناس الهموم ناس الضنى
كتبت فيك احلى الكلام نظمتا فيك اجمل غنا
خليت يمين كل البلاد واخترتا دنياك احضنا
معليش خلاص غلطان أنا وكل الحصل بتحملو
انا لى زمن متمنى يوم آخر المطاف بس اوصلو
ويقولو لى مبروك عليك ونبدأ الفرح من أولو
نضحك كتير جنب الصحاب فى يوم سعيد ما اجملو
معليش خلاص غلطان أنا غلطان عشان بغلط كتير
غلطان عشان قايلك هنا إمكن معاى تبدى المسير
غلطان عشان من النسيم لو مس لى جسمك اغير
غلطان عشان من دون جراح فى دنيتك داير اطير
ماكان زمان بتقولى لى غيرك محال اعشق حبيب
مهما قست كل الظروف أنا ليك ما ممكن اسيب
آيه الجديد فى حبنا آيه الحصل آيه الغريب
لو ما الزمان غير هواك ولقيتى لى جرحك طبيب
قولى زى ما الناس تقول انو الزواج قسمه ونصيب
معليش خلاص غلطان أنا ومن قلبى ليك كل المنى
تتهنى بى فرح العمر ويذدان قليبك بالمنى
ياهو القدر وانا راضى حتى لو انكتب لى الضنى
تتهنى انت مع النصيب وانا ليك بنظم فى الغنا
اصلوا الحصل ما منك انتى بس صحيح غلطان أنا .

رشاد العجب
01-19-2009, 10:39 AM
الشاعر خالد شقوري
*************
لـيـــــــنـا واصــــل يـا حـنـيــــــن وابـقـى واصل
الــدرب قـــدامــك أخـضـــر والوداد البينا واصل
والعيون الفى انتظارك شوقها زي مطر الفواصل

ما فى اروع من رسائل تحكي بي تحنان فصولا
ما فى أجـمــل مــن مـقـاطع انت بالأشواق تقولا
البـلــد مـنـتـظــره جـيـتـك فارده غاباتها وسهولا
والكـلـيــمــات الـتـطـمــن نحن منتظرين وصولا

بـيــن حـكــايـاتى السعيدة قصة من أشواق فريدة
جايـه لا لـون لا ملامـح زى نجوم طاشه وبعيدة
لا هى غـنـيـة ولاها منية ولاها إحساسات جديدة
ما الـبـحـسـو مـع عـيونك حاجة اكبر من قصيدة

كلـمـة مـنـك لـو تـعــاتـب أغـلى من كل الغناوى
والـبـتهمسو بين سطورك عندي بى كل الحكاوى
الـحروف الفى انتظارك رافله فى الزى السماوى
عـارفه إنـو الـغـنـيـة غـيـرك يا حنين ما بتساوى

رشاد العجب
01-19-2009, 10:41 AM
الشاعر خالد شقوري
************
يابــانه مابتصلى الســحاب بالله لاتـتطاولى
ايه الجنيتى بلا الخراب ليك كم سنين بتحاولى
قبال يرضرضك الزمن مش كان أخيرلك تسألى
وتعرفى سر قلبو الصبح من الندم صليان صلى
يابانه غشاهو الأمان خدعو المقام المخملــــى
ورغم الزمن وراكى وين لكنو قاسى تحصلى
ماأصلو قبلك كان بريد نجمايه فى قــلب الســمــا
يرجاها من عصرا بعيد فى تقنت الشوق النـمـا
يشقى ويشق صدرو الاسف تبقى دنيا مغيمه
وكان الفرح يملاهو يوم يلقى القمر غاب وأحتمه
ماقصدو بس داير يشوف النجمه واضحه معالمه
يابانه كان بالجد قنوع تكفيهو شوفت الملهمه
من الظهور حتى الإفول عينيهو ما بينومــــــه
كان من بعيد بيسالمه فرحان سعيد بيكالمــــه
لكن محال ينتم حـال جه الشوق ملك قلبو وعمه
وبدا الودار يومو القال النجمه لازم يوصلـــــــه
يابانه لاتستغربى بالله بس شوفى الحــصــــل
حضر كليمات الحنان زادو الغنى وشوقو الرحل
وأول محاوله للوصول داير مع النسمات يصـل
لكنو يركب فى البساط يلقى البساط مـنو اتمصل
فكر وقال عند المساء يرجاها فوق راس الجبل
وفى حلكة الليل الطويل يابانه لم الليل دخــــــل
شاف النجيمه معلقه وشاف روحو فى توب الجهل
براحه لملم أنتو فى ليلو واندرج نــــــزل
الشى العــجيب رغــم الفـــــــــشــــــــــل
لامله يوم لاحتى مـــــات فيهو الأمــــــل
وآخر محاولة للوصول كانت رحيلو مع الشعاع
إستنى فى الليل القمر ساب الأرض مقدار ضراع
وإستنى قارب الهم رسى فى مشرع الشوق المطاع
مسك الشعاع وبدا الطلوع بين الغيوم كان خبرو شاع
جات غيمه من بلد الندم سايقاها عاصفه من الوداع
قطعت خيوطو الماسكه واتهاوا فى لجج الضــيـــــاع
وعشان بريد من قلبو جد لقالو فوق اللجه طـــــوف
عيدانو من شجر الوفاء وحبالو من غالى الحروف
وداهو لى ساحل الندم وراهو فى العشاق صـنوف
قاليهو فكر ياقلب قاليهو عيد المـــاضى طـــــــــوف
إتواره غاب طوف النجا خلاهو فى إيــد الظــــروف
فتح عيونو مع المساء شاف النجم دانى القــطوف
بكى وابتسم وعرف صحيح انو البعيش لابد يشوف
لو كان صبر يابانه يوم وإتمده فى ضـل اليـقــــان
لو كان رجى الأقدار تجى وخلى القياده على الزمان
لو كان عرف انو البسير فوق الدرب يوصـل ضمان
مكان شقى القلب الودود و يابانه ماكان اللكــــــان
وصيتى ليك لمن يقوم غصنك جــديــــد إتــمهــــلى
أوعك تكررى محنتك أوعك كمان تستعجـــــــلى
بلاتروحى وتتعبى الغـــيث يجيــكى من العـــــلى
ولو انتى مــديت الصـبر حتى النجــم تتناولــــى

رشاد العجب
01-19-2009, 10:43 AM
الشاعر خالد شقوري
*************
نزل غيم الوداد صب غمر و ديان غناى عبأ
سرى الفرح الحنين تب
حضر وفد الولف سايق بشاشات المطر لبى
نزل غيم الوداد صب تعال تعال يا العمرو ما غب
تعال انا و انت فى عينيك من عينيك نتخبأ
تعال اشواقى ما قدرت تقاوم نسمك الهب
و كان جيتك تكون اروع زمن دابو الفرح تب
و زاهية الدنيا بالافراح و لسة آسايا ما تب
و كنت دخرتلك غنوات عشان أحلامنا تتربى
كفاك طول الامل يا ليل أخير تدينى باقى الحيل
قبل يجرى بهواى السيل والم فى العمرو ما غب
معاك ببنى المشاعر بيت معاك بحلف و أقول غنيت
و لابندم وأقول ياريت و لا بالجاى بتنبأ
نزل غيم الوداد صب غمر و ديان غناى عبأ
سرى الفرح الحنين تب
حضر وفد الولف سايق بشاشات المطر لبى
و كان حفل العمر ساكن بسيمة زولة تتحب

رشاد العجب
01-19-2009, 10:47 AM
الشاعر خالد شقوري
*************
طالعة منك امنياتنا وراجية فنك اغنياتنا
وما اظنك عارفة انك شايلة حنك في صلاتنا

انت فيك عزة بلدنا ونيل بلدنا وغيم بلدنا
انت فيك شفق المغارب لم بالافراح قلدنا
انت فيك مطرالعصاري والطوارى وفيك مددنا
انت فيك ريحة التعابة يا غناوينا وسعدنا


شدي حيلك ضووي ليلك شري غيمك في دروبي
وابقي للاطفال غناوي ونحنا مشتاقين تدوبي
ومن زمن راجيك تطلي بين صباحاتي وغروبي
وكلو ما تمرق نجيمة تاني اعشم لي تؤوبي

رشاد العجب
01-19-2009, 10:57 AM
3-الشاعر حاتم حسن الدابي
بدر مدر يا رواسي نحن بعاد لحقنا القيفة
انت مدبج ونحن نقاسى فى برد امشير والموج والزيفة
مركبك الماليها مطارق تمشي تقيف تسرح بى كيفه
مرة مغارب ومرة مشارق وانت تخاف الريح وحفيفه
ساوها زينة وفوقها بيارق وانت مدبج توب وقطيفة
فيها المات والضاربه الفالق والسلمين فى حالة مخيفة
كل الناس ترزح في كفة وانت وناسك فوق الدفة
الدايشين والراسهم لفة والشاخصين فى المدى للضفة
صوف افضالك فوقهم جوة فوق الموية وريقهم جفة
من العطش النص اتوفى وباقى النص الفضل جيفة
....
ضاقوا المر والحال استعصى الشغال واللاحق الحصة
الواصال للرحم اتقصة والهداي مو لاقى الفرصة
الرساي سافر ما وصى خلى محمد واحمد وحفصة
الاطفال العرفو القصة سدت جوة حلوقهم غصة
من الجوع الدم اتمصة واصبح كل الحلم رغيفة
.....
كل الراكب شاف احلامه دون احساس ماتت قدامه
فنُ كتابه وكسر اقلامه لا الوالدين لا جار ما لامه
ناس الحلة القعدوا وقاموا اصر والح يمشى كلامه
هزموهو اخوانه البى الجوع نامو وكم خريج ما لاقى وظيفة
.......
يا الفكيتها وقلت لها سيرى وعارف انه الدنيا دميرى
لا فى ضفاف لا شفنا جزيرى لا فى الحيرى ولا في الطيرى
كسرت جناحها وقلت لها طيرى اتملكت الكانت ميرى
يا السودت الناصع وجيرى ايد الحق صابونى وليفة
......
قبلك كم متعلم وقاري عكس الريح فكولو الصارى
مشدوهين متعشى وحارى ريسها شلته والبحارى
كم سنوات علام البارى واقفى وهم شايفنها جارى
بقينا هلاك والقيف متضارى لا حجار لا دوحة وريفة
.....
حسك عينك ما تتمادى وتنسى الراكب عنده ارادة
الاهوال الشافها وخاضها كان فى مدرسة والا عيادة
شفنا الايد الكان اجوادة يا مبتورة يا شحادة
وياما رقاب كانت سدادة علمت الله من التعريفة
......
يا ريسنا قدر مديرك فك الدفة وادها غيرك
احفظ نفسك ترضى ضميرك وقف اوع تواصل سيرك
كان طاوعتنى شن بيضيرك عرض اكتافك وفك البيرك
لا هنى شكرا وكتر خيرك وكل انسان في الارض خليفة

رشاد العجب
01-19-2009, 11:00 AM
الشاعر حاتم حسن الدابي
*************
يا ساري الليل : ما شفت عوض تابع النجمات فات لي قدام ؟؟

من يوم البحر الجانا وتسب وقام
يوم دخل الحلة وهدم بيوتنا ترا وهدام
صبحنا ضيوف ما خلاّ وراهو صلة أرحام
يوم داكا عوض خلاها مرق سفره طويل مع الأيام
ثم يسترسل في أوصاف عوض
درويشاً صغير عشرة أعوام
الزول زول الله من الصلاح الرفعت عنهم الأقلام
من غرث الرسل الدارو الآخرة أم خيرن دام
التركو نعيم الدنيا الزايل للعبدوها وللحكام
ثم يبدا في وصف ملابس عوض وما كان زاده يوم خروجه
متجلبب بي تيبان الرحمة غتا وهندام
متنعلت بي أرض الله الواسعة خطى الأقدام
متزود شايل خير الزاد تقى وإلهام
يا ساري الليل ما شفت جناح جبريل غتاهو بقالو مظلة جلوس وقيام
يا ساري الليل أين ذهب عوض هل غرق في جوف الليل أم رحل في رحلة تصوف
يبقالي نجع متوجه قاصد أرض الشام
ما شفتو هناك مع الحجاج لابس الإحرام
بين يثرب ومكة وفي بيت الله المكسي رخام
يبقالي هناك يكون مندسي مع الخدام
يا ساري أبل جهدك نحنا فتشنا في كل محل ما خلينا بكان
فتشنا سما أرض ما شفنا منام
في التمر الشايل تكا سبيطو مدلول خام
في الجرف الأخضر في لوبيهو وفي النجام
في جدول جاري تسرسر مويتو نعيماً دام
ومع ذلك لم نجده وقد طال الغياب ولن نيأس فالحلة في الانتظار فاينما وجدته بلغه السلام
يا ساري الليل أنا داير أوصيك وأديك كلام
الروح إين صعدت لي باريها وفي جنات الخلد مقام
لو لاقيتو في إي مكان في إي زحام
روح كلمو قولو الحلة بكت من شوقا إليك تغريك سلام

رشاد العجب
01-19-2009, 11:31 AM
الشاعر حاتم حسن الدابي
*************
مادام هى ما راعت شعورك ولا ضميرا هى استحى

أنساها والبكا مابيفيد قشقش دموعك وأمسحا

كلمنى شن وداك قبيل تظهر مشاعرك تفضحا

خليت حى السوق رياض يانعة وزهورا مفتحة

طولت إيدك لى قطوف زهرة وغميسة مسارحا

زى ما هى عاشقة الإغتراب برضو أنت عاشق ملمحا

ما كنت يا مظلوم دوام دايماً تشكرا تمدحا

وما ترضى لو كان بالغلط بى كلمة انسان يجرحا

ما كت فوق كل البنات تسرد محاسنا تشرحا

كانت عواطف إنسان ضعيف ساكت جناحى مجنحا

انشاء الله منها تتعظ تكون عظات تتوشحا

كانت حساباتك غلط فى القسمة والضرب اتمحا

اتأنى فى جبر الكسور براحة أجمعا وأطرحا

وآخر شى كان تعلرف براك حتى الغرام بقى مصلحة

بت حوة يا مظلوم بقت بالمال عقولا ملقحة

يا ريت قلوبنا الناس بعد ما تحب تخش المشرحة

يبدو المكامن فى القلوب كيف الشرايين تنضحا

يتراجع الأخدو اللسان صح والله زى ضل الضحى

مغرورة ما دارت سكون بلدن شقاوة ودردحة

لا تمشى تنزل بى تحت لا حتى أرضك تنقحا

لا بوغة لا موية شراب لا واطة ماها مصلحة

لا شلت للمحرات فطور لا شتلة ماها مصفحة

كانت قبيل طمعانة فيك فارسن جيوبو متمسحة

دايراكا يوم جيت للعرس نار الله فى الناس تقدحا

الشيلة بالشنط الكبار مقفولة راقدة مبطحة

فى الحلى والناس دار تشوف راجين متين تجى تفتحا

وكان بالا فى شهر العسل طول الزمن ما يبرحا

ترحل معاك لى بيت كبير موكيت وحيطو مسلحة

عربيتك الملك الحلال ..جلد النمر والملفحة

بوتوجاز مولع وديب فريزر وأب رموت والمروحة

تسرق مناها قبل يتم وكل المشاعر تضبحا

ويا جعفر الحياه مدرسة ودايما مقررا فى الصحى

ممكن نعينك فى الدروس لو إنت غلبك تشرحا

وأعرف بأنو أول درس الزول بياكل المقدحا

رشاد العجب
01-19-2009, 11:38 AM
الشاعر حاتم حسن الدابي
*************
انا الغلطان وكت غشيم وعدتك والوعد بوفى
بانك تكملى التعليم حلفت وداير ابر حلفى
درجتك بعقل سليم وامك واقفى فى صفى
دريج الرياح للغيم يبل عطش الارض يشفى
هندمتك حنان هنديم وغتنك تياب عطفى
وسولبت الكسانى قديم غضبى وثورتى وعنفى
قلبك كان سديد وصميم ومن الموبقات معفى
ترباة ريفنا احلى اديم ورزقا من حلال كفى
دخلتى الجامعة والله عليم بالفرح الغلبنى اخفى
كأنو مذاقو من تسنيم وقلت خلاص غمد طرفى
امك ليله كلو تقيم تشيل حر النهار تشفى
فراقك علما التنجيم وقليبه براكى بتعرفى
بتسأل الله والله كريم يعينك والمراد تلفى
يكسيك ثوب عفاف يا ريم وبى توب عافى تتلفى
كل الناس زمان سين جيم يخافو عليك زى خوفى
خلوهو السؤال فى الليم ومننا قطعو العرفى
عرفو بناى بدا الهديم ولا سريقه وما واقفى
واتاريك اتخذتى نديم واخرته كان زواج عرفى
لانك عمتى فى تيار معاهو بقيتى تنجرفى
بهرنك مدن وانوار وفيها سرحتى وا اسفى
وانا الناسى الزمن غدار ومانى قايلك بتنحرفى
اتاريك ضل ضحى وديار تركنى انا فى الهجير مكفى
نظرات البعيد والجار يوسوسو بى كلام مخفى
يوقد فى قليبى النار حى لكنى متوفى
كلام فى غيبتى ما هو اسرار يولع فى البلد ويطفى
واتسرب وصل للدار لا صدقتو لا بنفى
عمت فى البلد اخبار بقت جهرا قبيل خلفى
بقت نمه وبقت مسدار على وتر العصب عازفى
نسيت انا فى النهار الحار اكابد لى نجاح جرفى
اطارد فى الجراد والفار وانضف منو فى الطرفى
بعد خدر ملا النوار كساهو سماح يفوق وصفى
اتاريهو المتيربو عدار والسلكتو قام حلفى
انا الودرته عمرى ودار ومنك ما وقف صرفى
ليكى غزلت عرقى ازار وفى الشتاء بيه تندفى
مصاريفك على كتار وانتى تقولى ما بتكفى
واخافلك تقطعى المشوار أقولك اصبرى حقك فى
لاخليتى حق إيجار وحق المعهد الصيفى
تصرى تقولي جانى انذار وحقك تاخدى متكفى
تشيلني حرارة الإصرار وأعكر دمى شان تصفى
واصغر نفسى للتجار ديونا راقدى فوق كتفى
حليل زمن العلم أنوار موقدى نارو ما بتطفى
وحليل زمن القلم مزمار حلات نغماتو متوالفى
حليل امك وقليبه الطار رقدت بى شلل نصفى
ورغم انى اكتسيت بالعار ابوكى أنا رغم عن انفي

تيسير
01-21-2009, 12:43 PM
الشاعر/ علاء الدين ابسير
جن الريد
أحمد معروف بالطيبـة حسـن أخـلاق وعليهـا إتربـه
تكفي شهادة ناس الحلـة إنـو خلـوق وخجـول ومُربّـه
مهذب رغم حداثـة سنـو لبـس تهذيبـو أصالـة وهيبـة
أدي الناس الحـب أدوهـو حسـن الظـن بيناتـن شبـه
خشت فجأة أميمة حياتـو وصـارت بينـو وبينـا محبـة
قلبو إختارها عشان معروفة زولة حنينة وراقيـة وطيبـة
دسو الريد في السر بيناتُن وخلّـو حبيـس دفيـن ومخبـه
وكيف تنضارى متل أشواقن وليه زي ريدُن يـوم يتخبـه
بعد أيام وصلتـو رسالـة جـواب مليـان تقيـل ومعبـه
قبال ما يفتحو عرف الراسل باينة وظاهرة رسائـل وهبـة
أخوهو الليهو زمن متغرب تسعة سنيـن قضاهـن غربـه
مرسل ليهو تذاكر وفيزا دايرو يجيهو هنـاك فـي طيبـه
طار في الأول أحمد فرحه كلـم كـل النـاس والصحبـه
لما إتذكر أميمة حبيبتـو فجـأة إنتابـو شعـور بالخيبـه
لكن قـرر إنـو يسافـر سرعـة يعـود ويتـم الخطبـه
لأنو الغربه طريقه قصير وفيهـا يهـون تحقيـق الرغبـه
جاتو اميمة حزينة توادعـو جاتـو تجفـف دمعـو الكبـه
جاتو توصي عشان ما يقوى لا ينساها هناك فـي الغربـه
جاتو تطمنـو إنـو حيفضـل ريـده الخالـد مهمـا غبـه
حافظه عهود الريدة البينُن ومهمـا كـان ح يظلـو أحبـه
أهدتلو المصحف شان يرعاهو من العين والهـم والكربـه
لبّسه عهد الريد في جيده عقـد ممهـور بصـورة الكعبـه
قامو إتوادعو زين إتباكـو فـات خلاهـا وحيـدة وخبـا
سافر شال همو وأحزانو بعـد أيـام فـي المملكـة طبـا
لاقو الناس يا زول كيف حالك بالأحضان قام سالم وهبـه
قالو نصاح ناس أمـي وأبويـا مشتاقيـن راجنلـك أوبـة
قالو أحمد سافـر يـا وهبـه غيـر جـوَّك وروِّق حبـه
أمـك ياخـي تلاهـي عليـك لاخـلالا ضريـح لاقبـه
السودان مشتاقلك كلو ضفـاف ورمـال سواقـي وتربـه
وحتى النيل فرحان راجيك تجي وتنهل من مويتـو العذبـه
بعد أيام كان وهبه هناك بيـن أصحابـو وأهلـو وأحبـه
في حضن أمو الطول منو في حيشانـو الواسعـة الرحبـه
قالتلـو أمـو أخوانـك كبـرو ومـا فضلنـا زول يتربـه
بس فضلي أشوفو جديـدك وكتيـن لسـع حيـه وطيبـه
إختارولو بنيي سميحـي تشـع حيويـه ورونـق وهيبـه
أديبه وراقيه وكلها عفه وبرضو أهل وقراب فـي الحسبـه
يوم العرس الحي صباحي فرح مطبوق والنـاس منطربـه
شاق الليل صوت كم زغروده وحس طنبور ودليبـن ربـه
إلا في واحده حزينه وباكيه سايلـه دموعـا دوام منسكبـه
وفي دموعا سؤال بيحير وفـي آهاتـه أسـرار محتجبـه
وقالو الناس دي دموع الفرحه وغيرا شنو الحا يكون السِّبه
بعد أيام ساق وهبه عروسو ساقا رجع لـي بلـد الغربـه
سايقو حنين لي كل أصحابو ولي أحمد أخوهو أشواق ملتهبه
وصل الباب كورك يا أحمد فتح أحمد بـي لهفـه ورغبـه
شاف قدامو الما متوقع هم الكـون فـوق راسـو إنصبـه
شاف السلسل عهد الريده نفس السلسـل وصـورة الكعبـه
شاف قدامو أميمه حبيبتو كانت قاسيـه وقاضيـه الضربـه
شاف أحلامو تضيع قدامو بعـد مـا كانـت منـو قريبـه
كانت لحظه تفيض بالدهشـه شـاف الدنيـا كأنهـا كذبـه
كورك أميمه أميمه وصنقـع صنقـع ودنقـر ودّر وغبـى
وجن أحمد في نفس اللحظه جن الريـد مـا أظـن ينطبـا

تيسير
01-21-2009, 12:44 PM
علاء الدين ابسير
ميسرة
الزمن مهما كان عنيـد شكـل أفعالـوا وصـورا
برضو ننسى سواتـو ونقـول قسمـه والله مقـدرة
كل يوم يرويلنا بى فـن قصـة مختلفـة مغايـرة
بحكى من أفعالو واحدة بس مثال ما داير احصـرا
عاش منعم بيـن والديـن ريدتـو فيهـم متفجـرة
شبّ بين والد كان عطوف وبى حنان والدة مبطـرا
أسرة غرتو كل الحنـان وليهـو سقايـة محـدرة
***
ولـفّ دار دولاب الزمـن والقـدر يتـم ميسـرة
مات أبوهو الكان حنين وليهو كان الضل والضـرا
خلى لى أم ورثت الهم والنحيب ودمـوع ممطـره
خلى لى شابة اترملـت زهـرة يـا دوب منـورة
لسه فى ريعـان الشبـاب حلـوة أمـورة وآسـرة
فلته من عالمنا الضنيـن مستحيـل تانـى يكـررا
***
قررت تتحزم تقيف جـم وليـدا تكونلـو الضـرا
وتنسى إنو فقد أبوهو وتبقي هى الراجـل والمـره
رغم جو الهم والنكـد مهـدت لـو طريقـو يقـره
ورغم إنو زمانـا غالـى كـان بتقعدلـو مذاكـره
كان بتحلم بى وليـدا يبقـى كـان كابتـن طائـرة
والا يصبـح باشمهنـدس والا يتخـرج دكـتـره
***
والوليد اصبـح كبيـر وفاتـا يـا دابـو العاشـرة
والزمن غيـر كـل شـئ الا والدتـو مـا غيـرا
زادا فى نظر الكل سماح وفى عيون النـاس كبـرا
مرة يوم الحلى جاطت وقالـوا إنـو سعيـد دايـرا
كان سعيد راجلاً مهذب يملـك الجـاه والسيطـره
***
قام طلب إيد أم الوليد ونيتو صافيـة لبـن طاهـرة
دار يكون لها راجل أمين ويبقى والد لـى ميسـرة
حست إنو أماما إمتحان قاسي بيـن إتنيـن خيـرا
ختـت الشافـع أمامـا ومغريـا الكـون بـى ورا
بين وليدا الفارق كبير وبين قروش وحلى وأسـوره
رفضت الفكرة وبى أدب رسلتـو جـواب معـذرة
ورتو إنها داب وليدا وفى العـرس ماهـا مفكـرة
***
يوم سعيد نادى الشويفع رغبو وقال ليهـو واغـرى
جيب لى قلب أمك يا ولـد ولينـا طلباتـك آمـره
كان طلبت الشي المستحيل يبقى ممكن شان خاطره
كم فرح ميسره وإنبسط ولى ديارن فرحان جـرى
فتحت أمو احضانا راجا شان تضمو يطيب خاطرا
وبين ضلوع أمو الحنيني غزّ سكيـن لـى آخـره
***
وانتزع قلب أمو عجلان من محـل ريدتـو موكـر
وماتت الأم جم وليدا فوق دمـوم سالـت طاهـره
وشال قلب والدتو بين ايدى وزود السرعـة كتـرا
ومن كتر سرعتو قام وقعد وما عرف حاجه ومادرا
غير سمع قلب أمو ينضم وفيهو كم أنات عاصـره
بى كلام أشبه بالبكا ومـن حلـق ساداهـو عبـرة
يا جناى إن شاءالله طيـب بـى وقعتـك متأثـرة
***
كان كلام قلب أمو تيار فى دواخل الوجدان سـرى
رغم إنو يفيض محنه .. ضاق طعم كلماتـو مُـره
حس إنو فعـل جريمـه مستحيـل تلقـى المغفـره
سل سكين داير يموت وفى وسـط ضلعـو يوكـرا
دار يموت كان يرضى الضمير أو يكون للزيو عبره
الا تانـى قليبـا نـادا رجـع السكيـن لـى ورا
ولاتكتـل أمـك مرتيـن يـا جنايـا كفايـا مـرة

تيسير
01-21-2009, 12:46 PM
علاء الدين ابسير
سحابة حزينة
بعد طلَّتنا سحابـة حزينـة.. أحالـت ليلنـا.. نـواح وأسيـة
بدت الفرحـة خطاهـا علينـا.. تعـم آفاقنـا ..شويَّـة شويَّـة
نـار الغربـة ملهلبـة فينـا.. ونـار الشـوق ..اللِّـسـع حـيـة
حلاة اللقيا بعد طـول فرقـة وبعـد الغربـة سماحـة الجيَّـة
***
شوقى كتير لى لحظة شوفتك.. وشـوق أطفالـك بالكميَّـة
مشغولين بى ذكرة بابا.. وبسمـع بابـا.. صبـاح وعشيَّـة
جانـا جوابـك شايـل البشـرى.. بـى تحقيـق أجمـل أمنيَّـة
عودتك وعودتك بلسم شافى يداوى جروحنا الطالت نيَّـة
***
كنا نمنِّى الروح بى اللقيـا.. نـدارى دموعنـا ورا الحنيَّـة
وكنـا نطـوِّع زمنـا ً قاسـى..لـو الأقــدار تنـسـاق بالنـيِّـة
يفرح بيك طنبورنـا ويصدح..يعـزف ليـك أجمـل أغنيَّـة
وبعد إحجام صامتبو قريحة حترجع توحى إلهامه سخيَّة
***
لما تعـود حتكـون أيامنـا.. رايعـة ورايقـة وهاديـة هنيَّـة
عودتـك قمـة هـرم أفراحنـا .. هداهـا الينـا زمَّنَّـا هـديَّـة
لما تعـود حيهلل(ناجـى).. تجيـش أشـواق كانـت مخفيَـة
ورغم طفولة (نازك) إخيتو يقولها زغردى هوى يا بنيَّة

تيسير
01-21-2009, 12:46 PM
علاء الدين ابسير
اتحداك

أتحداك لو تنسيني أو لي حبي تلقى بديل
أنا الدرب الخطاي تمشيهو تعجز عن مشيهو الخيل
حبك ليا لو تخفيهو يظهر فى وشيك عديل
تبدأ ملامحو فى عينيك يقراها الكفيف بالليل
***
ما أتولد البسير فوق دربي والبخبر دروبي قليل
والدرب التطول ايامو بوصل ميسو في فد ليل
***
مابتنسينى مهما كان لأظنك تلاقى سبيل
والضاق الظلال فد مرة مابيرويهو حتى النيل
***
مابحزن عليك والله لو سالت دموعك سيل
جافة عيوني مما قمته مابتعرف عناق منديل
***
لو راجنى ارجع ليكى ماترجينى مدى حبل رجاك طويل
أموت والله مليون مرة أفضل من اجيك ذليل
***
برفض أطرا زول ناسينى مهما كان فراقو تقيل
لمن أريد بريد بالجد لمن انسي بنسى عديل
***
مابحزن على موت ريدنا بى أيدك كان أغتيل
والموت فى بعض مرات يكون افضل من العلعيل
***
لو كان الجمال غاريك بى احساسى ببقى جميل
لو معتادة يجرو وراك مابتلقينى من نوع ديل
***
حترجعى يوم براك تكتشفى انو هواى مالو مثيل
حترجعى لي حماي تكوسى في جنة غرامي ضليل
***
والبهدى لي لحن مثالي ابادلو جميع غناهو هديل
والحاول يمازح قلبى بلعب بى قليبو شليل
***
متأسف على إحساس اتخيلتى انو جميل
متأسف على أوهام سمينها عشق جميل
***
متأسف على أحلام بيني وبينا مليون ميل
متأسف لانى اهديت مشاعر ضوقتنى الويل
***
متأسف على شتلات زرعتها في الصحارى قبيل
أتخيلتا أنها تبقى واحة ريد ثمار ونخيل
***
ارتاح في ربوعا أنجما واحد من ثمارا أكيل
لكن ياخسارة زراعتي كانت جوه مجرى السيل

تيسير
01-21-2009, 12:47 PM
الشاعر/ علاء الدين ابسير
حليل الفارقتهم
انا في منامي اذكرتهم يا حليل حليل الفارتهم
المعز ومعاذ وامهم
خالد وابوي وابوي انا كيفنهم
انا أي طير بسألو منهم
انا قالي لي قاعدين في ضلهم
قاعدين يلعبو جنب عمهم
انا عارفوا ما بقصر منهم
قول لي يا عمي وضوهم هي
قمت لي منو عاد خالهم
بالله يا ادم طلهم وانت اقرب زول منهم
***
ود السيد عمي التلب المعز اوعا من الضرب
في العقاب خليك مستند والعقاب اوعك يتخرب
***
الجيلي خل بالك للصغير عمر الجا بيك مستجير
لا تغيبوا من البيت كتير يبقوا زي صابر والزبير
***
قسم السيد شوف البضربو للوليدات خليك ابو
اوعك الاولاد يتعبوا والبيعد ليهم قربوا
عايز اقوم انا اكتب جواب عنوانو عثمان عبد الوهاب
انا عارفو ياهو البجري العقاب يبقى في بدل الابو الغاب
***
عمي عبد الله تراك قريب والجواب مكتوب لي حبيب
يا هارون اصلا لا يغيب خالد من بالكم لا يغيب
***
قولي لي دفع السيد انا عارفوا عارف فرق الجنا
بالله اغشى ام زين طمنا اوعك الاولاد من عنا
ود ارباب يا عبد الرحمن اطرى لي خوتنا الزمان
انت لا تغيب من المكان شوف اليبكي وشوف الجعان
***
يا مدثر وفتحي وابزيد انا قولي لي جيران البريد
انت يا قيوم ماك بعيد وخلوا بالكم لابن الوليد
يا المبحر يا المقبل يا سائق العربية اتمهل
انت من السرعة قلل اوع قدام الحوش طفل
***
يا شباب حلتنا اجمعين يا الكبار ابقو لي سامعين
اه انا اه انا اه انا الكاتلني الحنين
للشمال الوطن البلد واهلي الطيبين

تيسير
01-21-2009, 12:48 PM
الشاعر / علاء الدين ابسير
حبى انا ليك كان زادى
حبى أنا ليك كان زادى وكان جوه الحنايـا دفيـن
كتّ بضارى من الناس وخايفه عليهو مـن العيـن
عليهو كت بصوم وافطر عليهـو بكابـد الناريـن
كت بحسب سنين الغربة لما تعـود تجينـى متيـن
وكت برجاك فوق النار لمـا وكـت لقانـا يحيـن
نونس فى براءة أطفال وفى الحب نروى ننهل زين
وكلما يوم يزيد البينـا لمـا بقينـا قـاب قوسيـن
اتارى أنا كت فيك مخدوعه وكم من زي مخدوعين
ما قايـلاك حبيـب آلاف وقلبـك قبلـه للضاليـن
وما قايلاك بتنسي حبيب صبر راجيك ستـه سنيـن
وساهر كم ليالـى طـوال يتقلـب شمـال ويميـن
كيفن يهون عليك تنساهو زولاً كان عليـك حنيـن
وتشغـل بالـك الأشـواق لمّـن تزبـل الياسميـن
كت دايراك بسمة عريضة فى وجه الزمان الشيـن
وكت دايراك ساعة الحاجة تبقى ليّ دخرى خزيـن
كت دايراك مقنع حوبه وكتيـن المضـارى يبيـن
وكت دايراك فارس احلامى تشاركنى ونتـم الديـن
وكت دايراك أمل بسام يزيل ألـم البعـاد والبيـن
كت دايراك شريك الروح واخدمك حافيـة القدميـن
وكت بحلم بك انت معاي مجرتق بالعديـل والزيـن
جنبك فى يمينك قاعده نسمع فـى دقـر يـا عيـن
تبشر زين مع الأصحـاب وتتشبـل مـن الوزيـن
أنا الأبحرت راكبه الموج اكيد مرسايا بين موجتين
وداعاً يا زمـن ظالـم وبالأفـراح علـيّ ضنيـن
وداعـاً يـا قلـب قاسـي لا بيحـن ولا بيلـيـن
وداعاً يا سراب خداع محال ما بيروي عطشانيـن
وداعاً يا كلام معسـول حـدو ومكمنـو الشفتيـن
وداعاً يا سحابة صيف شايلى مطر ضليـلا رهيـن
تبشر بى خريف جايينا ياما الناس رجوهو سنيـن
كل زولاً يفكـر فيهـا مـا معروفـة تنـزل ويـن
وألف سلام عليك يا قلبي المسالم وديمه طبعو حنين
يتاورو الشوق ويلعب بيهو تنحر فى حشا السكيـن
تعاودو الذكري تنتر جوا حالـو يحنـن المسكيـن
أخيراً مى ليك سلام وقبل ما تجـف دمـوع العيـن
وقبال منى ما تعـدى وقبـال الفـراق مـا يحيـن
بخيت وسعيد عليك إن شاءالله يبقالك عمار وبنيـن
وقلبى أنا خلى فى أناتو بعدك يامـا راجـى أنيـن
ولو كان يا قلب حبيت بعـدو بعـد قسمـت يميـن
ما ينتمّ ليك مـراد لا تضـوق لا حلـو ولا زيـن
وتفضل طول حياتك تبكى طول عمرك تعيشو حزين
وعمرك ما تجيك سعـادة مـا تتهنـا قـول آميـن
وتانى الحب عليك حرمان ووعد الحر أمانه وديـن

تيسير
01-21-2009, 12:49 PM
الشاعر / علاء الدين ابسير
جاروا الاهل
جاروا الأهل خلوكى تتباكى بين نارين
نار الظلم والجور وبعد الحبيب الزين
ظلموكى فى أفراح راجاها ليكى سنين
كتلو الفرح جواك وئدوا السعادة جنين
خلوكى زى طفلاً باكى وتملى حزين
وعايش حياتو عذاب مابين نواح وأنين
لوقدروا جاروا على وشالوكى من العين
حتظلى فى جواي يقدر يشيلك مين
لاتبكى تشكى البيك يبقن على همين
مابيتحملو بكاك قلبى العليك حنين
بيناتنا ختو أميال شان نتفرق ناسين
إنو الحبيب بالشوق بيطير بلاجنحين
أنا مامته موتت ذله انا مت بى سكين
لكن قدربى صديق بى سيف خيانة سنين
لامينى ليل ونهار عارف الشهير ودفين
وريتو أدق أسرار ما كان عليها أمين
صبراً على الأيام يمكن شويه تلين
تجمعنا بعد الحال ننساهو مر البين
وكت انتى زى تمام وقلوبنا متعاهدين
حنعيش حياتنا أحباب ونشوف حيخسر مين

تيسير
01-21-2009, 12:50 PM
الشاعر /علاء الدين ابسير
اصـدقـلـك دميـعـاتـك

اصـدقـلـك
دميـعـاتـك ولا أقـــول كـلامـهــم صــــاح
اعيـش علـى الماضـى ولا اقــول ده مـاضـى وراح
حيران مانى لاقى جواب عشان ارتاح وتانى ارتاح
وفــى الدمـعـه لا تـبـكـى خـلــى الـدمــوع الـتـرتـاح
***
سلاح الدمعة حـاد وسنيـن ومافـى احـدا منـو سـلاح
لكـن مـا بتفيـد دمـعـات الـمـات مــا تجيـبـوا ســلاح
كـل مـا احـاول استسلـم اجبـر نفـسـى ابـقـى سـمـاح
انـت يـا قليبـى انـزف دم واحـس بمشـرط الـجـراح
***
يقطـع فـى قليـب الهـم ويزيـد علـى العليـهـو جــراح
كيـف اكـذب كـلام مثبـوت عـمّ الدنيـا سمعـوا وفـاح
اصبح زى اثـر منحـوت لا بفـوت لا بتشيلـوا ريـاح
شقيان اصلى لامن اموت ومـا اظـن بنكتبلـى نجـاح
***
رجعـتـا زى حالـتـى خـســران جـيــت بـــلا ارواح
بعـد عبـرتـا بـحـر الـريـد انــا الـربـان انــا المـنـاح
يتبلـد سـمـاى غـيـوم وهـبـت تـانـى عكـسـى ريــاح
***
رجع مظلوم وزادى كفاى همـى الشايلـو كلـو نـواح
بعـد مـا زرعنـا واحتنـا ريـد وحنـان حـب وافــراح
وقـام فرهـد نبـت ريدنـا قـرب يــوم حـصـادو ولاح
مـات البانـى املـى عليهـو ورجعتـا بحسـرة الـفـلاح

تيسير
01-21-2009, 12:51 PM
الشاعر / علاء الدين ابسير

اتحداك

أتحداك لو تنسيني أو لي حبي تلقى بديل
أنا الدرب الخطاي تمشيهو تعجز عن مشيهو الخيل
حبك ليا لو تخفيهو يظهر فى وشيك عديل
تبدأ ملامحو فى عينيك يقراها الكفيف بالليل
***
ما أتولد البسير فوق دربي والبخبر دروبي قليل
والدرب التطول ايامو بوصل ميسو في فد ليل
***
مابتنسينى مهما كان لأظنك تلاقى سبيل
والضاق الظلال فد مرة مابيرويهو حتى النيل
***
مابحزن عليك والله لو سالت دموعك سيل
جافة عيوني مما قمته مابتعرف عناق منديل
***
لو راجنى ارجع ليكى ماترجينى مدى حبل رجاك طويل
أموت والله مليون مرة أفضل من اجيك ذليل
***
برفض أطرا زول ناسينى مهما كان فراقو تقيل
لمن أريد بريد بالجد لمن انسي بنسى عديل
***
مابحزن على موت ريدنا بى أيدك كان أغتيل
والموت فى بعض مرات يكون افضل من العلعيل
***
لو كان الجمال غاريك بى احساسى ببقى جميل
لو معتادة يجرو وراك مابتلقينى من نوع ديل
***
حترجعى يوم براك تكتشفى انو هواى مالو مثيل
حترجعى لي حماي تكوسى في جنة غرامي ضليل
***
والبهدى لي لحن مثالي ابادلو جميع غناهو هديل
والحاول يمازح قلبى بلعب بى قليبو شليل
***
متأسف على إحساس اتخيلتى انو جميل
متأسف على أوهام سمينها عشق جميل
***
متأسف على أحلام بيني وبينا مليون ميل
متأسف لانى اهديت مشاعر ضوقتنى الويل
***
متأسف على شتلات زرعتها في الصحارى قبيل
أتخيلتا أنها تبقى واحة ريد ثمار ونخيل
***
ارتاح في ربوعا أنجما واحد من ثمارا أكيل
لكن ياخسارة زراعتي كانت جوه مجرى السيل

تيسير
01-21-2009, 12:53 PM
أمــل وألـــم
الرائع علاء الدين ابسير

مين القال الدنيا بخيلة وديمة تشيل أبداً ما بتدي ؟
طبع الدنيا متِل ما قالوا زي الموجه تجيب وتودي
زي ما الفرح أيامو جميلة بتمشي بسرعة بدون ما تهدي
الأحزان تتنسي لحظاته وبرضو تقضي أيام وتعدي
*** *** ***
حزنت كل الدنيا عليه لمان مات الحاج (ود احمد)
يتم خمسة صغار يتباكوا أكبر واحد إسمو (محمد)
بعدو (أميرة) و (أمجد) و (سامي) وأصغر واحد فيهم (أحمد)
رمَّل (فاطمة) الباكية عليهو ونار أحزانه أبت ما تخمد
قعدت ومسكت راسه تمنح وتبكي الزمن الجاير وأسود
كيفن أقدر أشيل الشيلة أصلو الحال سجمان ومرمد
وكيف يا خويا تسيبني برايا في نص ليل وأمواج ورعد
حست بي أيدين ضاماها وحركة زول قدامه قعد
رفعت عينه تشوف الحاصل كان قدامه وليده (محمد)
قالها يُمه أنا عاوزك تصبري وأعرفي أنو جد وقت الجد
ليشن زغردوا ناس الحلة لمان قالوا ولدتي ولد
صغير أنا يمكن بس لكين في الحارّه الشبل بيستأسد
بشيل الشيلة علي لا تخافي بس دعواتك لي َّ مدد
بعود يا يمه الفرح الضاع مهما إتغيب وطالبو أمد
وفعلاً خلَّ المدرسة سافر وللأرزاق ما خلا بلد
والله أجاب لي دعوات أمو بقاله وليده يمين وسند
وكان بت عمو (أمل) شايفاه فتي الأحلام وبطل الغد
وكانت أمل الكل في الحلة جمال متميز وفايت الحد
تحبو وكل ما مرت سيرتو بتلقى خياله معاهُ شرد
وكل ما تحاول تكتب ليهُ آخر لحظة تخاف تتردد
تقولوا إتكلم وريح قلبي انا مبعا بت وأنت ولد
وكيف البت تتطاول وتعشق ويبقى سكات الولد الرد
كيفن تسكت ولي تتجاهل ويبقى أخير ملاك (السيد)
الدرويش الزاهد وهامل لا عندو أهل لا عندو بلد
الدرويش الجابو الشارع وفي زاوية حلتنا قعد
يسقي الشتل الضال بي جوزو ولي أزيار الزاوية إتجند
تقولو تعال بخطبلك أملَ معاى أخدم يتخيلو جد
تلقى حرت لك إنقايتين وبوَق وتيلن ومارن وسنَّد
ويومو اليبقى جعان ومفلس وسط الناس ينضارى ويشحد
وكلما شِلت صفيح للموية توتل جوزو معاي ورد
يحكي لي عن حبو وريدو وليهو سنين بس راجي الرد
وأنت سكاتك طال يا غالي وأنا راجاك مستني وعد
آخر يوم في إجازتو مشاله حكاله ظروفو وليها سرد
إنو الحالة مِتل ماك عارفه خليط ممزوج من فرح ونكد
يوم الفرحة تطير بالواحد ويوم أحزان وسهاد وكمد
وأول فرحة تعطر بيتنا يوم ما إتخرج وسافر (أمجد)
قال في الغربة بحقق حلمو وفيها طريق أحلامو معبد
بس نستنَ (أميرة) تكمل وأفرح بيك وبي حبنا نسعد
وتبقى الدنيا إبتسمت لينا وليك بتقدم وما بتردد
وخلي البينا يكون بيناتنا وسوي ضلوعك للريد سد
وسافر وعاد لي شغلو محمل بي إحساس أخضرَّ ورفهد
سنين عشرين من عمرو تمر مما سافر ويمكن أزيد
ما ضاق فيها حلات النوم ولا مرتاح فد مره هجد
وبنيت عمو هناك منتظرة والعرسان كل يوم تتردد
يناجي خياله يقولها أصبري لا ناسيك لا شوقي برد
قريب ألقاكى وأبل الشوق ويبقى لقاي لي حُزنك حد
*****
يوم جابولو جواب مستعجل فتحو ولي صفحاتو فرد
لقا جواهُ الما متوقع وآخر شي في عقلو ورد
سيل الدهشة جرف تفكيرو ولي لحظات بي عقلو شرد
طول الليل راقد سهران لا جاه النوم لا لحظة غمد
قرر بكره يسافر بدري ولما يعود حيكتب الرد
ولمن صبحت كان في اللوري حجز قدام في الكرسي قعد
وصل البيت الطوَّل منو بعد ما إستن وصبرو نفد
سالم خالتو وعمتو (زينب) وبالأحضان لي أمو قلد
حكى بالحاصل ليهم كلو ولي مضمون القصة سرد
إنو الجابو أمر مستعجل تفصح عنو رسالة من (أمجد)
كاتب قال نخطبلو بسرعة وحدد لي بت عمو قصد
قامت عمتو (زينب) فاتت لي بيت عمو تجيب الرد
أمل قالتلها خير يا عمة دون ما تفكر أو تتردد
ضمته عمتها قالت ليها إنشاء الله يكون بيت مال وسعد
إنتي جميلة بتملي العين وبرضو مهذب ورايق (أمجد)
سكتت لحظة وقالت تضحك عمتي غلطت قالت (أمجد)
(أمجد) مين يا عمتي صلي الإتقدم أخوه (محمد)
قالت عمته لا لا الدايرك ورسل خطبك (أمجد)
ويلا معايا براك بي نفسك شان ما نمشي هناك نتأكد
ولما (محمد) أكد ليها كان إنهارت وحيله برد
قالها (أمجد) فعلاً عاوزك ودمعو يكبكب فوق الخد
عشانو بضحي بأعظم حاجة ولو الحلم عشانو إتبدد
إنتي الروح بهديك إياهو وراضي أموت لو بيكي بيسعد
أنا المهدت طريق أفراحو كيف في يوم أجي أكون السد
ديل أخواني الأنا ربيتم وريدي أنا ليهم ما بتحدد
أنا خليت الدنيا عشانم وضقت عشانم ويل ونكد
ولو بتقسم فوقم عمري بقسمو فوقم ومابتردد
ونحن خلاص أصبحنا أخوان والموضوع بيناتنا أتعقد
كيفن ترفضي (أمجد) وترجعي عاد تنتظري (محمد)
واقفة (أمل) قدامو وتسمع ودمع العين في عينه جمد
كأنو إغتال الشوق العارم ولي أفراح جواها وئد
قالت كيف إتهنى بدونك وكيف في الدنيا بدونك أسعد
جرح الليد سرعان ما يبرأ وجرح الجوف كيفن يتضمد
وقلبي العشقك كده يستاهل إنو يعيش طول عمرو مشرد
وفاتت خلتو واقف ينضم ساهية وسارحه وباله شرد
وكان الريح تنهر بي بره هبوب وأمطار وبروق ورعد
والسكان من بدري إتلمو وكل واحد في بيتو هجد
ترجف وتبكي مباري الحيطة نص الليل كان قاصدي (السيد)
كان في الزاوية رقد هلكان راح في النوم لي إيدو إتوسد
متفرشلو دلق شوال جنب الحيطة رقد وإتمدد
صحتو قام مخلوع من نومو من قدامه بسرعة شرد
قالتلو رضيت بك وبكرة نعرس ما صدق بالهجمة قعد
وفعلاً بكرة بلا زغريد جاب شاهدين وعليها عقد
وبكت الحلة عليها هي حية وعاشت يومه دموع ونكد
وبكى بي حرقه وسافر وراجع جاري زيول الخيبة (محمد)
كتم الحزن العايش فيهُ وحكى بالحاصل كلم (أمجد)
قالو قسمت البت لي غيرك وكلو نصيب مكتوب ومقيد
خبر (السيد) وامل اتوزع بين الناس إنزاع واتردد
إنها عاشت في تعذيب والعبرات إنقلبو غدد
وإنو قليبه على الأحزان والالآم بالحيل إتعود
ويومه الفرحت وجابت بت حزنت تاني ومات (السيد)
ويوم الصدقة سمايتة كانت قالو الناس سموها (شهد)
وبعد سنتين إتحكى بالصدفة وفي الحاضرين كان قاعد (أمجد)
عرف القصة تدور حوالينو وقف الدم في جسمو جمد
كِره الدنيا وكِره الفيها وبكى وإتألم ولحق الحد
قاعد يبكي ويبكي ويبكي لمن غاب ولي وعيو فقد
كيفن أخوي الضحى وعانا عشاني إتبهدل وحلمو إتبدد
وكيفن أكون أنا سبب أحزانو وكيفن أكون لي فرحو لحد
دا المن قام ما غلط حاشا ولا بي حاجة على جحد
بعد يومين رجع السودان دون إنذار أو سابق وعد
عانق أخوه عناق مشتاق لي محبوبو أحضانو فرد
قالوا أنا عايزك توعدني وتحلف وتقسم ولي تتعهد
إنك إنت و (أمل) تتراضو وعهد الريد المات يتجدد
وبينك وبينه يعود الماضي ويحيا شرار الريد الهبد
هِن حلين يا أرجع أسع ولا كمان في عقدك أشهد
أخيراً وافق أخوه وخاصة بعد ما العودة طريقة إتمهد
وعاد من تاني فتى الأحلام وللمحبوبة العود أحمد
عادو وعاد الفرح الغاب وعاد من تاني وإتجدد
وفوق راس بيتم غنَّ القمري رقص طربان غنَّ وغرد
ونخل الحلة رقص فرحان مال طربان سل وجبد
وقعدو سوا الإتنين في الكوشة وكان بيناتم قاعدة (شهد)
بسمته ضاوية أطراف الدارة وختت فوق كل واحد يد
رسمت لوحة حلم اللقيا بي تحنان في أروع مشهد
وكل الناس بالفرحة إتباكو وكل إنسان للتاني قلد
وكانت (أمل) القمر الضاوي وكل الشافه وقف وإتشهد
وكان الفرح الفي عينيها دون ما تحسبو غنَّ وردد
زي ما الدنيا أحزانه كثيرة الأفراح ما ليها عدد

رشاد العجب
01-25-2009, 10:49 AM
:الشاعر حاتم حسن الدابي

قومةمن النباه ما ضاقلو قوت الفاه
غير كلمتين فى اليوم إعتادن الحلقوم
من الصباح للنوم يا مـحسنين لله
تبدأ الصباح بالآه ومنك زمن تواه
وتتمسى يا الله من شدة المأساه
ترقد رفقت الشاه حالاً صعب رضاه..

جواها صوت مخنوق ما بيسمعوا المخلوق
وبالاً شتيت ممحوق وأنه أسى وخازوق
بحت لسان مريوق ينادى مـعـتـصـمـاه
يا محسنين لله
حبل المروه الكان ممدود من الجيران
وأعـمـــامـه والخلان بالمطرقة وسندان
يا حليل رجلنا زمان بس فضلو الأشباه..

قبال ثلاثة سنين يتمت من الوالدين
ومن بعـــــدو بسنتين راح الكفيل وحنين
خلا لها دمعة عين وخلا لها خمسة أفواه..

صبارة قادرة تطيق كل الآلم والضيق
وتغلب نشاف الريق والمصلا والابريق
وقلبـــاً وفى وصـــــديق لا ضل يوم لا تاه..

إلا الصغيرونين يتبـــــاكو هم دايرين
فى لحظة وحين مـا بيعوفـوا المن وين
والحــوجة سيفه سنين يقتل رقاب الجاه..

سالت دموع أنهار جسر الصمود إنهار
عارفى العدم جبار مر ما بيراعى صغار
إلا الفقر مـو عار بس للوجوه شواه..

ضايقى العذاب كم نوع وعارفى السؤال ممنوع
شبعانه فوقو الصوع ورويانه نوح ودموع
الله يجازى الجوع كم كم حنالو جباه..

تب يا زمن مـحاق من ضلك الرقـــــاق
يا قاسى يا فراق يا اللى الفرح سراق
حنضل أساق دقاق مـا بيحملنو شفاه..

عطش السنين فى الجوف طرد السئم والخوف
فرش دواخلى حـروف روينا بالمعــــــــروف
ولا قلة المصـــــــروف لا الحـــــوجــة تتوطاهتم حسن الدابي

رشاد العجب
02-15-2009, 10:18 AM
يانسمه مين غيرك يكسر حواجز البين
يتحفني بي اخبار مريودي نور العين
طولته مستني يكتبلي لو سطرين
يحكيلي كيف حالو وان شاء الله هو زين
مفروض يكاتبني مهما اكون انا وين
حسب اتفاقنا الكان يوم كنا متفارقين
رسلته مكتوبين ما جاتني أي ردود
ان شاء الله مانعو هو خير لا يبقى صد وجحود
يا حليلي انا الممكون وصابر على ناري
وكل ما ادس حزني تفضحني اشعاري
وكل العلي والبي اسبابو من جاري
ويومي الاقصر انا ما بيقبل اعزاري
يا نسمه قوليلو الحال وراك مايل
والليل بلاك ليلين وديمه الدمع سايل
قوليلو يومك داك يومي البقيت راحل
ماقلت لي الرد ما تشيلو هم واصل
يا نسمه عارفاني مكتول ضناني الشوق
للبلد من جم صلحاب كري والسوق
عمرابنا والقوزين ليهن سلام مطبوق
خاصه المحطه تحت وقز ام شديرة الفوق
شوق البلد جواي يا نسمه ازاني عديل
خلاني ابكي وانوح كل ما اشوف النيل
اطرى الجروف والناس تنزل دموعي تسيل
يمارى لي منظر منقه و قرين ونخيل
يا نسمه شفتي البي وتابعتي بالتفصيل
ارجوكي سافري خلاص واوعك من التاجيل
برجاكي فوق نارين حزني وظلام الليل
وبصبر لي يوم يومين فيها الله بيه كفيل

رشاد العجب
02-15-2009, 10:19 AM
عشان خاطر عيونك ديل افارق حلتي وطني
اسافر من بلاد لي بلاد كمل صبري وراح بدني
اضوق المرة واتغرب واكون مجبور اشد رحلي
وافوت ناسا حنان طيبين واقوت مرتع صباي واهلي
اشيل الزاد غنيواتن اردد فيها من جهلي
كلامه يقول انا الراحل وجاييك بكرة يا املي
جاييك يا غرام الروح لو حتى السنين دار تابة
وجاييك لو سنيني تدور وتدوس امالي انيابة
وجاييك لو يطول الليل ولو يبقى الوطن غابة
جاييك قولي لي كيف انساك وانا السافرته عشان عينيك
فت درب الوطن والعزة والحله المنورة بيك
فت امي وقليبه الحاني وحاجات تاني خافي عليك
وانت لا تشغل قليبك بيها ما دام الصحاب حوليك
قول لي يا حبيب برجاك لو حتى اغترابك طال
وقل لي ما بخونو هواك وما بسمع كلام عزال
وقول لي غير غرامك انت ريد يشغل قليبي محال
وطمن قلبي يا مريودي باقي الغربه زاته نضال

رشاد العجب
02-15-2009, 10:21 AM
يطول عمرك يا امي يا ست الدار
ياخد منا ويعطيكي بدل العمر اعمار
الله يقدرنا يا امي ونكافيكي
اعطيتي والله ووفيتي قد ما فيكي
يا امي الله يطول بعمرك ويخليكي
الدنيا انتي زينتها وزينة الدار
ما بننسى سهرك لأجلنا من لما كنا صغار وكبار
يطول عمرك يا امي يا ست الكل
بنفرش دربك بعيدك ياسمين وفل
صرنا نزورك يا امي وبعدها عنك نفل
عرفنا قيمتك يا امي لما صار عندنا صغار
ربنا يا امي الجنة تحت اجريكي مخليها
شو نفع الدنيي يا امي لو ما انتي فيها
بتسوي الدنيا يا امي وكل اللي فيها
يجازيكي عنا كل خير رب الابرار

رشاد العجب
02-15-2009, 10:23 AM
مسافة السكة وأرجع ليك معايا الشوق وغُنواتو
أنا البهواك وقلبي عليك وأنا الزول البِحب زاتو
*******************************

مسافة السكة مهما تطول برضي مصيري أرجع ليك
ألم حزن السنين الفات وأقيِّل في ظلال عينيك
ألمِّع بالحروف دنياي وأخاف أحزاني ترسى عليك
ألِِم باقي العُمر تحنان وأقول للناس حِكاياتو
*******************************

ما يهِمك كلام الناس وحاتك إنتي ما ناسي
أنا البحسِب عشان ألقاك ثواني الفرقة وأنفاسي
وعارف لوعتك يا روح كيفن إنتي بتقاسي
وأعمل إيه مع الأيام مع قلبي وصباباتو
*******************************

مراسيك وين عشان أرتاح وأعِوض قلبي عن صبرو
معاك بحصِد من الأفراح حصاد زولاً زرع عُمرو
أنا الراجيك ولي جِراح مُناي بي إلفتك يبرو
والآقيك في زمن نشوان تصُب للحب غماماتو

رشاد العجب
03-02-2009, 01:49 PM
رايك شنو

رايك شنو نفتح مساحات للحوار
ويا امة عاد نتفق ياكلو حي يسكنلو دار
معقولة بي طول الزمن راس مالنا يبقى الاعتذار؟
لاقادر القاك واستريح لا يدرك الليل شهريار؟
بهواك انا..بهواك انا وعارفك كمان شايلني في دنياك منار
لكن غرورك وعزتي كانن بدايات الودار
لا انتا رضيان تعترف..لا قلبي راضي الانكسار
ومابين غرورك وعزتي جنتنا صبحت نار في نار
بالله ايه؟بالله كان ناقصنا ايه غير نحنا نحترم الجوار؟
ماريدنا تشهدلو الدروب والموية والضل والخدار
اوعك تقولي الزمن بي قسوة غير للمسار
واوعك تقولي الظروف بيناتنا ختت كم جدار
ما انت بي ضغطك علي خليتني اتخذ القرار
كل ما اجيك انا باليمين القاك في اقصى اليسار
تذكر ايامنا الزمااان..واحلامنا كان نبنيلنا دار
انشالله في طرف الفريق ياوينا من حر النهار
وياما كتبنا على الدروب اشواقنا بي خطا كبار
ياااربي وين راحو الحنين واللهفة ديك والانتظار؟
لا زال خطاباتك معاي اقراها..يملاني الحسار
وفي كل رسالاتك تقول قولا منمق باختصار
في بعدك الوقعت علي لومرة وقعت في الحجار
والله تبكي وتنتحب وتلبس من الاحزان سوار
ياااربي وين راحو الحنين واللهفة ديك والانتظار؟
ماكنتا دايما لي تقول لقيانا اكبر انتصار
وقبال يمر العام عليك ختيت علامة الشك شعار
مفروض تشاركني الحزن يوم شتت احلامنا العصار
مش تمشي تبكي وتنتحب وترحل تخليلي الديار
قصر الاماني الكان زمان للزيي والزيك مزار
بنى فوق بوابتو العنكبوت واتلما فوق عتبو الغبار
والارضة مسكت في الحجر والنيمة صابا الاصفرار..

رشاد العجب
03-02-2009, 05:04 PM
مكتبة الشاعرالفاتح ابراهيم بشير

--------------------------------------------------------------------------------

الفاتح ابراهيم بشير
سالت القمرا يوم بالليل تشرح لى شنو العجبا
قالت لى براك فسر يا اس بطل الغلبا
قت ليها عاجبك الليل وصمتو الطوق العقبا
قالت لا
قت ليها عاجبنك الزراع ما ديل نفوسم غضه كالعنبا
قالت لا
قت ليها امكن الصناع ما ديل للدوله عصبا
قالت لا
قلت ليها امن الساسه ما ديل بالم طوييييل تقول سلبا
قالت لا
قت ليها امكن العسكر ما ديل بياكلوا الجمره بى لهبا
قالت لا
قت ليها نان شنو العاجبك اااا القمرا
قالت لى من قبيييييل تفسر وساولك جلبا
وماك عارفنى انا القمره بموووووووووت
فى
فى
فى
فى
فى
فى
ريدة











الطلبه

رشاد العجب
03-02-2009, 05:05 PM
مكتبة الشاعرالفاتح ابراهيم بشير

--------------------------------------------------------------------------------

يانسمة مين غيرك


يانسمه مين غيرك يكسر حواجز البين
يتحفني بي اخبار مريودي نور العين
طولته مستني يكتبلي لو سطرين
يحكيلي كيف حالو وان شاء الله هو زين
مفروض يكاتبني مهما اكون انا وين
حسب اتفاقنا الكان يوم كنا متفارقين
رسلته مكتوبين ما جاتني أي ردود
ان شاء الله مانعو هو خير لا يبقى صد وجحود
يا حليلي انا الممكون وصابر على ناري
وكل ما ادس حزني تفضحني اشعاري
وكل العلي والبي اسبابو من جاري
ويومي الاقصر انا ما بيقبل اعزاري
يا نسمه قوليلو الحال وراك مايل
والليل بلاك ليلين وديمه الدمع سايل
قوليلو يومك داك يومي البقيت راحل
ماقلت لي الرد ما تشيلو هم واصل
يا نسمه عارفاني مكتول ضناني الشوق
للبلد من جم صلحاب كري والسوق
عمرابنا والقوزين ليهن سلام مطبوق
خاصه المحطه تحت وقز ام شديرة الفوق
شوق البلد جواي يا نسمه ازاني عديل
خلاني ابكي وانوح كل ما اشوف النيل
اطرى الجروف والناس تنزل دموعي تسيل
يمارى لي منظر منقه و قرين ونخيل
يا نسمه شفتي البي وتابعتي بالتفصيل
ارجوكي سافري خلاص واوعك من التاجيل
برجاكي فوق نارين حزني وظلام الليل
وبصبر لي يوم يومين فيها الله بيه كفيل

رشاد العجب
03-02-2009, 05:06 PM
ليه كل الدروب
يا قلبي الحزين وين تمشي ليه كل الدروب مقفولة
كيفن زول يصل للجامعة يرجع تاني لي سنة أولى
ياما كتار حليلهم ضاعوا في زحمة دروب مجهولا
يزرعو في النوايا الطيبة كان ثمرة ضياع محصولا
الواحد يريد النجمة ما بيقبل يشوفو افولا
تلقى وسط ظروفو يشابي عشمان انو بكرة يطولا
مسكين كان يخادع نفسو بي سحب الخريف وهطولا
متعشم يقول المسرة يوم باكر يدقو طبولا
مسكين ياحليلو اتناسى نكبات الزمان وفصولا
واتناسى انو نحن غلابا احلامنا العراض مطبولا
من زمن القراية شراي ما بشوف غير سيوف مسلولا
كل ما اقول وصل لي مرسى القى احزاني شادى خيولا
قاسي الزي يقلى الداريو نقاي يعرف المصقولا
اول ما يقول ديك لي كل خلق الله بكرة يجولا
عايش فد سؤال جواي ليه لحظات فرحنا عجولا
وايام الحزن تندب زي السلحافية مهولا
اختلطت على ايامي قدامي الهموم مسدولا
ممشكلتي العلي ومالبي ما هو مرض دوا وكبسولا
اه اه اه اه اه اه اه
اه من دنيتي واقدارا اه من جحيما وهولا
شينا الزي بلقى الدايرو منو الدمعة ما مقبولا
لكن يا رفاق بالدغري كلمات بي صراحة بقولا
انا كان جنيت او ودرت تبقى ظروفي هي المسئولة

رشاد العجب
03-02-2009, 05:07 PM
احتـرت كيفـن اوصفـك .. والله يـا قبلـة غـنـاي
لو كان بحور الكون مـداد بتجـف قبـل مـا تنصفـك

حاولت اكتب ليك واقول * واوصف ملامحـك بالشعـر
لكن حروفي تـذوب عديـل * قـدام عيونـك تنصهـر
يا عايشة في دمي وغناي * يا ديـدن الـروح والفكـر
خلدت اسمك بي حروف * قطرات دمـاي كانـت حبـر

يا غنوة في وتري الحزين * يا ضحكة في الزمن الصعب
يا واحة في عز الهجير * يا راحـة مـن بعـد التعـب
يا نسمة هبت في الدغيش * عزفت علي وتـر العصـب
يا رحمة من رب العباد * مكبوبة فـوق خلـق الله كـب

سافرت في عينيك سنين * زادي المعـاي ابيـات غنـا
مكتوبة بي دمي الصبـح * شـلال مـن الهـم والعنـا
صورت احساسي الدفيـن * بـي قافيـة ليـك معنونـة
بتقول بلا كلفة ورتوش * يا انتـي يـا المـوت والفنـا

احترت في وصفك انا * وحارت معاي كـل الحـروف
مرات بشوفك يا منـاي * ياقوتـة فـي قلبـي الولـوف
مرات بشوفك ضي امل * دبج خطاي رغـم الظـروف
مرات بشوفك جارية نيل * امواجـو عانقـت الجـروف

رشاد العجب
03-02-2009, 05:08 PM
الفاتح ابراهيم بشير



أريتو الشوق

أريتو لو الشوق زى البريد بيطوف


أنا كنتا يا خلاي سويتو فى مظروف


سطرت بى دمي أجمل وأرق حروف


وعنوتو لى إنسان ملك السمع والشوف


زولاً بريدو شديد كان لى مسافة طوف


فى لجة الأحزان وكتين ملانا الخوف


بهواهو يا خلاي ودغدغ هواهو الجوف


ما استغلا هواى مع إنى بيهو شغوف


علمنى كيف الريد نبنيهو طوف فوق طوف


ونتحدي للآلآم ونتجاوز أي ظروف


أصلو البريد غير زولو ما بيشوف


لو جابو ليهو الحور قدامو ماشه صفوف


أريت وصالنا يدوم ما يبقى بينا عزوف


نوصل مراسى الريد بعد الشقى المردوف


أنا اصلى يا خلاي بين الخلوق معروف


زولا بريد الناس ودايماً قليبي شغوف


أنا نفسى أشيد دار بالريد دوام مسروف


لى كل زول مظلوم ردا الحبيب مكسوف


وأكتب على بابوا تعبير دوام مألوف


يا صاحبى لا تحزن فى الدنيا نحن ضيوف

ود نصيري
06-29-2009, 10:29 AM
يديك العافية يا رشاد يا الكلك شجون على الروائع دي ---- نحن منتظرينك تكمل و ما عايزين نقطع لك حبل السرد

رشاد العجب
08-10-2009, 04:06 PM
التحية لك اخي الرائع ونصيري وشكرا علي مرورك.
لما جيت راجع بدونك كنت فاكر ممكن الايام تمر
ممكن اتحمل غيابك مهما كان صعبان ومر .
الا جيت. لقيت من غير عيونك لافى ايام لاعمر

رشاد العجب
08-10-2009, 04:08 PM
طفت كل الدنيا سائح قرية مدن مدن
واقتنعت اخيرا انو زي نظر والقول والحزن
مافي أجمل من بلدنا ومافي أجمل من شمالنا روعة تتحدى الغبن
الخضار والموية فيهو وطلة الوجه الحسن
ويا سلام قيزان إيماني وقمرة زي لوزة القطن
النخيل والمنقة شايلة في الحفير مادي الغصن
والقماري وقت تقوقي صوتا يملا ركن ركن
زي موسيقا الصوت يجينا هوي احمدو ربكن
الله علام الخفايا ما بيخيب ظنكن
البلد والله جنة وغيرا ما تبرد بطن
طيبتا وناسا وشموخا بلسم الهم والحزن
مافي اجمل من بلدنا ومافي اجمل من شمالنا وعزمتم زي التمر
وروعتا وناسو السمر وكبرياهم واعتزازهم
وغنو في عز المواجع وقاومو الحال الفقر
وعلمو الناس التصافي والتسامح والصبر
وديل من النيل شرابم حاش ماعرفو المكر
وياسلام وكتين يغنو بالطنابير للفجر
الصحاب والشلة عامرة ناس محمد وبابكر
وقعدة فوق رملات بلدنا خاصة لوكانت عصر
اسمي من كل المعاني وأغلى من مليون قصر
وتكية في راكوبة باردة والدباس حولك يمر
وتحتك البرسيم منور وجنبو كم ريقان تمر
وصوتو مزروع في الجزيرة وحالو ما عندو الصبر
وتبقى براد طول نهارك والعرق منك يخر
وفجأة جات فيك نسمة باردة وحركت فيك الشكر
وبي هناك واحدين يحشو وبي هناك شافع يجر
لوحة ما أحلاها لوحة وروعة ما أحلاها روعة في الحليل في القيق يجر
وتفرح الناس الحزاني وتبعد اللوم والكفر
شوفتو كيف روعة بلدنا وروعتا وناسا ورحابا وليه نغنيلا ونصونا
وليه نقدس لي تارابا بس لأنو القاطني فيها أقوى من صلة القرابة
والخضار القايمة فيهو مروي بي عرق الغلابة
دى الشمال ورانا انو بالوصال تبقى المحنة وبالمحنة إحساسنا يرهب
ونطرى خلانا وأهلنا وبي أهلنا الدنيا ترحل
ونبقى في تحقيق أملنا وبي أملنا أحلامنا تكبر ونبني أمجادنا وطنا
ومافي أجمل من شمالنا والوطن دائماً معانا
دى الشمال دائما معانا والوطن دائما معانا
في خواطرنا وحروفنا
والبلد غاية منانا ولما تتماسك كتوفنا نبقى فوق واديها غيمة
وباينة للزول البشوفا دى البلد أنبل امانة
ودى الشمال أنبل أمانة حقو نحملا فوق كتوفنا
والوطن أنبل أمانة حقو نحملا فوق كتوفنا

سيف الدين الزين خليفة
08-10-2009, 06:53 PM
لك التحية اخونا رشاد ومشكووور على هذه الروعة

http://www.goraaljabal.com/upload//uploads/images/domain-7c5eb711e1.gif (http://www.goraaljabal.com/upload//uploads/images/domain-7c5eb711e1.gif)

رشاد العجب
08-11-2009, 12:23 PM
شكرااخي سيف علي مرورك ودمت بسعادة

رشاد العجب
08-11-2009, 12:27 PM
من زحمة الايام بجيك شارد مـن الحـزن العلـى

تضمينى بتحنان عليك قبل يمـوت الشـوق عينـى

انتى الوحيده الفى الوجود يبقالى بس خلقـوك لـى

اهواك اريدك اعشقك اعطيـك مـا ملكـت يـدى

انتى النداوه الفى الصباح شقيش مشيت القـاك فـى

قولى كيف انساك انـا وانتـى بتمثلـى كـل شـى

والله يوم التزعلى دنيـاى تبقـى هجيـر وصيـف

والحكمه يومو التضحكى يبقالى يضحك كـل شـى

جاييك والايام معاى عصفوره فـى مخلـب حـدى

مسكينه قاصداها الظروف لكن كويـت كـل حـى

كم مره خاصمنى الخريف جافاها ارضى ودى ودى

طفش على سرب الفـراش لا خلـى آرام لا ظبـى

انا شن بسوى مع الزمان كاوينى فى وجدانى كـى

خلانى سواح فى البـلاد فاضلـى ارتـاد الثـرى

كل ما اقول اشفى واطيب القى الجرح جـواى نـى

احتجتا يا خل للعذاب رحماك يا محبوب ياخ علـى

اشواقـى والليـل والمـداد اتناغـم فـوق الـودى

وكتبت على صدر الزمان إن شاء الله يسعد كل ش

رشاد العجب
08-11-2009, 12:33 PM
شعرى الحزين يا يمه يحكى ليــك كيف بعدك أنا
وكيفن كمان فى الدنيا رحتا وتهتا فى درب الغناء
يانى الجنيت على الزمان أو كان زمانى على جنى

شعرى الحزين يا يمه يحكى ليك
ساعة جن قوافل القدرة ساقنك معاهن
ورحتى لى دار الخلود
سألتا عنك يايمه ما خليت دار (جار)
وبكيت عليك من غير حدود وين أمى
يا ناس الفريق ؟؟
نزلت تحت خلتنى ليه ما كان تسوقنى
فى ساعة الحليب عند الورود
ويسكتونى يايمه بى تعريفه أو حبات تمر
ويقولوا لى أمك مشت سوق الشرق وهسع تعود
صدقتا أنا ما عارفك يايمه فارقتى الوجود
وما عارف إنى وراك اكبر واجرى بدرب البنات
قلبى داك ماهو الرهيف تلقى
يمه يشابى كل ماواحده جات
ولولا العمير عند سيدو كان بدرى سمعتيبوا مات
وقصة شقاوتوا وراء البنات يايمه تب مابتتحكى
يمرق صباحوا يلمهن يضحك معاهن يتبسط
ويرجع وراهن تانى للنوح والبكى
عذبنوا جرحنوا من الجروح ما لاقى صفحة
عليها يرقد ينتكى
ومالاقى صاحب وجعة يبركلوا الفكى
ناس المحنه يمه فاتو وخلو ينين يشتكى
أهو غايتو حالى حالوا ما حالا بشع
لليلى جارى وراء البنات يايمه لا اكتفى لا قنع
بس الفضلو تجيهو بالليل فى المنام
تهديهو لى كان يقتنع
ولا اندهيلو يمه رب العالمين
والأولياء والصالحين
إن كان يتوب قبل العمير فاضلوا تو ماينقطع
اهو غايتو حالى يمه نوحى واساى
بكرة القدر كان جاب رواحلوا
وجانى شن خليت وراى
غير عبرة فى ليلاً طويل
ودمعات سكبتها فوق أساى
وصبحن بقن شعرى وغناى
ماياهو قدرى وجانى عاد براى
مالازم اصبر كمان واتحمل اذاى
وعشان كده أنا اصلى ما حدثتا زول
وما داير زول فى الدنيا يكون متعذب معاى
بس داير اقولك شعرى البهديهو ليك
امسكى عندك واحفظى وختيهو
لمن ولد الغناى يجيك. سؤال

رشاد العجب
08-11-2009, 01:15 PM
زول في وضوحو بلا الشمس ود حمد احمد يارفاق
من شب قام درفون صغير سوالو جو الناس عرش
يا هو الركيزة الفي الفريق زول حوبة شقيش ما يمش
تلقاهو قدام الرجال حاشاهو كلمتو ما بتطش
من شب قام زولا قنوع ما زك يوم درب القرش
وما شالو حق زول بالغلط وما بيرضي سمعتو تنهبش

في ليلة كان راقد حزين وسارح في الزمن الوحش
كيفن بعد كان حالو زين والسوق مفرهد ومنتعش
مرت عليهو سنين عجاف خلت ضماير الناس تطش
بس فجأة سمع الباب يدق ويا الله قام من الفرش
بي سرو قال إن شاء الله خير واطرافو كلها ترتعش
فتح البوابة بلا نفس وقدامو كان ود الفتح

قال ليهو ادخل قالو لا انا حالي ما داير شرح
قال ليهو جيت والعشم سايقني يا اب رايا سمح
وقفت قصاد بيتي الظروف حلفت يمين ما تزح
البيت معاهو المدرسة خلني بي ايدي ازح
والنخلة هادي قدر تشيل ياخدوهو قبال يصطبح
قال ليهو بس نقع البنوك سلفية والحال ينصلح
قلبة وقلبتين يا رفيق وبعدين نشيل نحن الربح

يا إمة نقع الفتل ما الدنيا اصلو فرندقس
يوم انت طاير في السماء ويوم تحبو في جمر الفلس
بس قوي قلبك يا رفيق ونضمك يكون عجوة محس
من بعدو كان درت النجوم تلقاها في شهقة نفس

قبال كمان تصحى الشمس مشى للخزين ود العوض
قال ليهو إلا تمشي معاي اولادي ديك اكلو القرض

اتماسكو الاتنين سوا ودحمد احمد داير يطير
مرات يجك ومرات يخب ومرات تحسبو زي عزير
بس فجاء في لمح البصر لقى نفسو قدام المدير
نفذلهم كل الشروط وفيهم شرط قاسي وعسير

كان الشرط إيه الضمان ما البنك منهجو برمكي
صاحبنا قام رهن الارض الشاربة من دمو الزكي
مداهو معنى الانتماء والضحكة في الزمن البكي
ذرات ترابة تقولو لا والدنيا غرقت في البكى
وين تاني تلقالك حضن ياويك وكتين تشتكي
مين السواي البفهمك يا حمد احمد غير حكي

انا ياني امك يا جناي من قمت زي تمر الفكي
يومو اليشيل فوقك تعب لا بد فوق انا تتكي
لا بد ترجع لي صاد لو حتى في اخر العمر
ربيت اعمامك وابوك وما احتاجو لاعند القبر
يا ابني لا ترهني هو يا ابني عضي الصبر

ود حمد احمد بي اختصار خلط البيصلح بالبضر
ما همو ايه باكر يكون ما طالا حقق للغرض
شال القريشات وانطلق وفي جيبو شيك سمو السند
مبسوط ويضحك منشي وصاحبك يخوجل في البلد
اولادو دايرين يابا جيب صاحبنا يدي بلا عدد
البت تجيهو المدرسة صاحبنا يدي بلا عدد
الحاجة همها توب سمح صاحبنا يدي بلا عدد

لامن شهور الجن مضن لقى نفسو مخنوق بالمسد
الشيكا باقي وقيتا جا اقصاهو لا يوم الاحد
ودحمد احمد انضرب بقى يجري زي القنقرد
مرات يفوتك في السلام مرات يسوى بكى وحرد

بس فجاة صاحبك اختفى همل عقابتو وشرد
ما راعي احساس الورا وما راعي لى البت والولد
ولي زوجتو الممكن تضيع في زحمة الزمن النكد

رشاد العجب
08-11-2009, 01:17 PM
ميسرة

الزمن مهما كان عنيد شكل أفعالو وصورا
برضو ننسى سواتو ونقول قسمة والله مقدرة
كل يوم يرولينا بى فن قصة مختلفة مغايرة
بحكى من أفعالو واحدة .. بس مثال ما داير أحصرا

عاش منعَّم بين والدين ريدتو فيهم متفجرة
شبَّ بين والد كان عطوف وبى حنان والدة مبطرا
أسرة غرتُو كل الحنان وليهو سقاية محدرة

ولفَّ دار دولاب الزمن والقدر يتّمْ ميسرة
مات أبوهو الكان حنين وليهو كان الضل والضرا
خلى لى أم ورثت الهم والنحيب ودموع ممطرة
خلى لى شابة اترملت زهرة يا دوبا منورة
لسة فى ريعان الشباب حلوة أمورة وآسرة
فلتة من عالمنا الضنين مستحيل تانى يكررا

قررت تتحزم تقيف جم وليدا تكونلو الضرا
وتنْسِى إنو فقد أبوهو وتبقى هى الراجل والمرة
رغم جو الهم والنكد مهدت لو طريقو وقرة
ورغم إنو زمانا غالى كان بتقعدلو مذاكِرة
كان بتحلم بى وليدا يبقى كان كبتن طائرة
والاّ يصبح باشمهندس والاّ يتخرج دكترة

والوليد أصبح كبيِّر وفاتا يا دابو العاشرة
والزمن غيَّر كل شى الا والدتو ما غيرا
زادا فى نظر الكل سماح وفى عيون النَّاس كبرا

مرة يوم الحلى جاطت وقالو إنو سعيد دايرا
كان سعيد راجلاً مهذّب يملك الجاه والسيطرة
قام طلب إيد أم الوليد ونِيْتُو صافية لبن طاهرة
دار يكون لها راجل أمين ويبقى والد لى ميسرة
حست إنو أماما إمتحان قاسى بين إتنين خيرا
ختت الشافع أماما ومغريات الكون بى ورا
بين وليدا الفارق كبير وبين قروش وحُلِى وأسورة
رفضت الفكرة وبى أدب رسلتو جواب معذرة
ورتو إنها داب وليدا وفى العرس ماها مفكرة

يوم سعيد نادى الشويفع رغَّبو وقال ليهو واغرى
جيب لى قلب أمك يا ولد ولينا طلباتك آمرة
كان طلبت الشى المستحيل يبقى ممكن شان خاطرة

كم فرح ميسرة وإنبسط ولى ديارن فرحان جرى
فتحت أمو أحضانا راجا شان تضمو يطيب خاطرا
وبين ضلوع أمو الحنينى غِّزَّ سكين لى آخره
وانتزع قلب أمو عجلان من محل ريدتو موكرة
وماتت الأم جم وليدا فوق دموم سالت طاهره

وشال قلب والدتو بين ايدى وزوَّد السرعة وكترا
ومن كتر سرعتو قام وقعد وما عرف حاجة وما درا
غير سمع قلب أمو ينضم وفيهو كم أنَّات عاصره
بى كلام أشبه بالبكا ومن حلق ساداهو عبره
يا جناي إن شاء الله طيب بى وقعتك متأثره

كان كلام قلب أمو تيار فى دواخل الوجدان سرى
رغم إنو يفيض محنة.. ضاق طعم كلماتو مُرّه
حسَّ إنو فعل جريمة مستحيل تلقى المغفرة
سلَّ سكين داير يموت وفى وسط ضلعو يوكرا
دار يموت كان يرضى الضمير أو يكون للزيو عبره
الاَّ تانى قليبا نادا .. رجِّع السكين لى ورا
لا تكتل أمك مرتين .. يا جنايا كفايا مرة

رشاد العجب
09-16-2009, 02:06 PM
الشاعر
وراق المجذوب حاج الماحي

الحلة في امن وامان وناس البلد فى عيشتن زى عادتن
بعد الصلاة وشاى الصباح كل زول مرق لى شغلو راح
الراح على الدكان فتح والساق غنيماتو وسرح
والشالو طورية ونزل لى شغلو ما قام بى كسل
والشالو منجل دار يحش للفى المراح والدى الجنا
وللدار يبيعا تمصرفو ودون السعية يسمنه
حتى الصغير الفى المدارس فى المواعيد قام مشى
فى ايدو خرتاية كتب حاشيها كراسات حشى
وفى التانى كورية لبن بى كسرى بايتى من العشى
والاهلو حالن منصلح عاسولو قراصة قمح
* * *
وناس البلد فى عيشتن زى عادتن
* * *
حتى الحريم الشايلى مقشاشى وتقش
والعلقت سعنه وتخش والخاتى حلته للفطور
قبال تفور تنشمه ريحته فى الفريق زى البخور
والدوكى دخانه انطلق وحس الفنادك طق ... طرق
* * *
وناس البلد فى عيشتن زى عادتن
* * *
قسوة كفاح ما فيها لين
خدمة ضراع وعرق جبين ورغم الكفاح
عبر السنين ما اتغير الطبع الحنين
الناس تلاقيك بالبشر وماب تلقى بيناتن نفر
يوم فى وشى الضيفان كشر
طبعن مأصل فى البلد تلقاهو فى الراجل الكبير
فى مرتو فىالبت والولد يتفقدو الحال من بعض
* * *
وناس البلد فى عيشتن زى عادتن
* * *
واليوم يمر يتعدى فى ايام الزمن
وعند المغيرب كل بيت اتلمو ناسو على صحن فيهو الزلابية
يقرضو وفى ايدن الشاى اب لبن يتعدى من ضمن السنن
وكان الفريق راق من صراخات الصغار
الكانو يلعبو فى الشوارع كورة .. والشد والصراع
وصوت البهايم والنعاج فى الحلة تسمع ميغ وباع
ومر الوكت فسراع مشى وفى الخلوة اذنو للعشاء
عبد الرحيم ... اتناول السبحة ومرق
لاقاهو عند الباب حمد شايلو تلغراف معنون بالاسم
عبد الرحيم ... وكان فى وشى حمد اضطراب
فى راسو مية سين وجيم يمكن يكون
جاك من عمر
يا جاى يا رسل مصاريف الشهر؟؟؟
عبد الرحيم ... هزا اصبعو وقال : الشهر باقيلو سبعة .
تمانية يوم وكمان عمر برة البلد وما عندو اجازة
عشان يقوم .. كدى عاشة جيبى اللمبة جاى
انشاء الله خير من جناى
فتحو وقراهو وفجأة غز ايدينو فى الواطة وقعد
عمر الوحيد ؟ لا عندى غيرو البت ولا عندى الولد ؟؟
يا عاشة .... مات .... مات يا حمد
وطق التكاليب فى البلد
وعبد الرحيم فى حالو من القعدة ديك
كرعيهو لا شالنو تانى ولا مشن
لا اتحركن ... لا اتمددن زى التقول اتكسرن
والحلة تبكى بكا السواد والناس دموعا من الفؤاد
عمر ( الصبوح ) الكل بت تتمنى ليها شريك حياة
عمر الصبيح الكل زول بتمنى لو كان ود حشاه
اخلاقو سمحى وزول سمح دايما يلاقيك منشرح
طول عمرو ما غلط على زول فى البلد
تلقاهو فى الحارات سند
حتى الصغار وكتين يقولولك عمر
تحلف تقول الحلى غيرو بلا بشر
ما خت يوم فى نيتو شر كان قلبو انقى من الزهر
يا حليل عمر ... كان فى عيون الليل قمر
والليلى غاب خلانا للزمن السواد
حزنا اليم وبكى وحداد
وحال الحريم فى بشتنة وحال امو عاشة اسى وضنى
ولدا الوحيد الغيرو ما ولدت جنا
يا حليلا مساها الكبر واصبح دريبة اقرب من الحياة للقبر
وعبد الرحيم راجلا كبير واخر عمر
الليلى لازم العنقريب ساهى ومساهر للفجر
كيفن يعيش ويعيشا عاشة ونفسو ما قادر يحركه للعذر
وناس البلد فى عيشتن زى عادتن ما قطعو منهم العشم
البى دقيقو يزودن والشايل السكر مع الزين والفحم
وحاج البشير جاهن برا قال لا تقولو عمر مشى
واصبحنا نحنا بلا ضرا كل البلد ليكن ضرا
ولو كنتو دايرين اى شى لا تخلو غيرى يكون وشى
خلونى ليكن اكون عمر ودكانى لى حاجتكم انتو يكون ضهر
وسالت دموع عبد الرحيم واستغفر الله العظيم
ورفع ايدو ينده للبشير يتهنى فى خيرو العميم
وبعد البشير ما راح سرح عبد الرحيم
فى بالو يوم يوما قبل اربع سنين وكتين عمر جا...
وقالو يابا الليلة جيتك بى خبر
خير يا عمر انشاء الله خير قول يا عمر
يا يابا ناس الجيش جوا قاعدين فى كريمة وما بعاد
دايرين يعينو ناس جداد وباقيلى باكر اخير لى امشى مع الولاد
عبد الرحيم قالو : اَ عمر ؟
مالك علينا ودار تعلمنا السهاد يا ولدى ...
ولدا جيتنا فى اَخر عمر وامك وانا ...
الاتنين بقينا عقاب كبر ان رحت للسوق القريب دا
وراكا ينشغل الفؤاد نامن تجينا اَولدى صاد كيفن تقولى
اخير لى امشى مع الولاد دار تبقى دياشى
وبعد ماك فى عيونا نكون بعاد
الواطة ماله اَولدى ؟؟ اخير فقش الجراب
ريحة دقيقو التمسكك كرفة صبر غاية الحصاد
ولا شرارة الياها قفيلة بيوت ؟؟؟
موت يا جناى والموت فرض بس لاشنو
من جيهة الزناد نعمين فدايةَ للوطن
يا كم تقاند الطين سقت من دم جدودك وبتقت
انبل جهاد لكن عمر تب ما رضى
وما ليهو فى القعدة المراد
وكتين خلاص صمم يروح عبد الرحيم قالو ... اَجناى
الله المغتى هنى وهناك

رشاد العجب
11-21-2010, 12:46 PM
الشاعر الفاتح ابراهيم بشير....

الحب والصداقة اتلاقو في حلتنا يوم
والجو كان جميل في الحتة كاسياه الغيوم
الناس في سعادة وبهجة اوعك من هموم
بلا فجاة الوضع يتغير وصاب الناس وجوم
الحب والصداقة اتشكلو وبالغو في الهجوم
وكل واحد يشكر نفسو وللتاني بيلوم
نحن مابين الضحك والدهشة قضينا احلي يوم
الحب قال:
أنا المن قمت معرف في البلاد
عنواني الاماني العذبة والنوح والسهاد
والغيرة التعذب سيدا تحميه الرقاد
والشوق التلهلب نارو في ليل البعاد
خشتلو الصداقة وقالت :
الحب كان زماااان
يا مسكين انا المن قمت عنواني الأمان
الثقة والوداد حقاتي والناس الحنان
والضحكة التجلجل صافية في الزمن الهوان
الحب قام ضحك ياخلا بي صوتا عجيب
وقاليهم عليكم الله ياناس ماهو عيب
وروها الصداقة حدودا وكل القايلة غيب
انا الروح والزواج والاسرة انا لي مليون دريب
هنا
شوف عيني الصداقة اهتزت واعياها الجواب
وقالت ياكريم يا الله الهمني الصواب
قالت والزعل ماليها انت ضيعت الشباب
بي سببك ولاد الحلة من الجن قراب
الحب بي غرور ردالا قاليها : الشباب
شن جابهم قبيل لي بحري لا طوف لا شراع
اسمعي داير اقولك كلمة بي كل اقتناع
الزول البميل في الرقصة مايلبس قناع
قالتلو دة كان زمان وكت كنت وفي وعفيف
والعشاق زمانك كانو صح ريدهم شريف
لكن الزمان خلاك في الواقع مخيف
لابسلك قميصا تاني وبدلت النضيف
قاليها:
الصداقة اسكتي وخلي نهارنا يمشي
قبال ماامرق العارفو ومن بيتك تطشى
بي سبب المصالح انتي جوة النار تخشي
وبي اسم الاخوة الصادقة للحبان تغشي
قالتلو الاخوة الصادقة مكمنا في الضلوع
والقانون بحاسب ناسو بي نية الشروع
الزول القبيل بكيتو وماعرف الرجــــــــــوع
ياني انا البطيب خاطرو وامسحلو الدموع
الحب هنا نكس راسو من كتر الكسوف
ومن كتر الزعل ياحليلو ماقادر يشـــــوف
قالها والزعل في عينو تسلم لي الظروف
انا البقيت كل خلق الله بي اربعة حروف
قعدتلو الصداقة قصادو ونضمت بي رواقة
وقالتلو الكلام القلتو مليان بالشــــــلاقة
أي اتنين معاك اختلفو جوني انا الصداقة
وضميتهم علي بي الفة ياشين ياخــــلاقة
قالها اوعك ماتسيئي ارجوك وانضمي بي ادب
قالتلو الادب مدرستي يا اب طبــــــــعا كعب
قاليها الكلام القلتي يهبش في العــــــــصب
قالتلو انت اناني وتهمــــيشك وجــــــــــــب
وكتين الكلام احتد والنـــــاس دار تفـــــوت
يبقالي القيامة ورانا قامت في البيــــوت
العاقلين هناك اتلمو وقالو باعلي صـــوت
الحب والصداقة ونيلنا من غيرن نموت