مكتبة عاطف خيري

[رشاد العجب]

أقراك صاح
عكس احتشادك في الحضور
هل غاب معاك وعي الطريق
ام بيكي زكاني الزمن
ماشيك..وعارفك ياحريق.. في يوم غمامتك..يجن
فرهد غيابك..اغنيات
ظلت اراضي اللقيا بور
بلقاكي ياكل الطيور..
مسجونة والحرية..سور
بلقاكي بيناتا الثبات
وبيناتنا شمس البكرة في لحظة مخاض
*************
طول الوجع رشح مواطن العافية..فيك
خلاني ارجع وابتديك
واقراكي من كل الجهات
ومابين اقابلك..ومشتهيك..كان حلمك الاول ترف
وكنتي الصبية الغايبة في زحمة حجا..وكلمة شرف
كنتي الزاوية الميتة..في متحف خزف
كنتي الوصايا العشرة..واللون الشحيح
************
سميت مساحاتك حكر..
كل البيحلمو بالشمس
هجرت من واقعك ..عبث
سكنت فيك ضد السكون
كل اللي كان ممكن .يكون
وطارت ضفيرتك ليل غنا
جدلة صبر..وطولة نفس
*************
وما بين اقابلك وجيت عليك
كان عندي ليك بس نحن..والجرح الثري
وخيبة امل ام الشهيد
في الكلمة..والوجه الجديد
وكلمة إحتقان نبض الزمن
نومة طفل..فوق الدمن
...ياصاحية بي الحاصل العلي
يانايمة عن فقري البليد
سميت منافيك الوطن..
صبحت مناحاتك ...نشيد

[حسام العالم]

شهيق
كلمات / عاطف خيري


نكــــر صــوتك صـــداك
غــالــطــني الـزمن فيك
شــهرت عــلى الجــفاف وعدك
بطاقاتنا الخريفيـة .
رجــع فاضـي الكــلام مليان
معــاك إتــبـرجـت غـيـمة
وشهق جوايا صوت جدول
مـرقت على المطر حفيان
لـقـيـتــك والــرذاذ مــدخـل 000.
ونـاديـتـك …أقـيـفـي مـعاي نشيل كتف الغناء الميل
ونتخيل حلم دونك بيتحقق
وقبلك خيل دماي واقفة علي شرياني تتشهق
وبرق صوتك صداك غنيتي

*********
*********

رشحت حلقك لإذاعات الشجر
والمنتظر من عودة المدعو المطر
وللمسادير و الطنابير
واللسة في رحم القصيد
والدابو هسة وفي سوق عكاظ
بين مزادات الحروف غيبت رسمك وإحتكرتك للظروف
للزمان الجاي واللحظة الى فاتت مني هسة

*********
*********
لك التحيه اخي زاد الشجون وانت تفتح هذا البوست لهذا المبدع دوما ما يدل علي روعه وجمال زوقك

[رشاد العجب]

معتوهة ،معتّقة
ومنعتقة
نوافير إنتشاء حشمة .وحـمار العين
تنقي من القبور السكلبة
ومن بيت بكاك زيف المعزين تضحك
كلما وقعت مصيبه
تمشي علي العجين تلخبطو، ترطن اذا جاها الحنين
يابت
بيوت الهجعة كيف
وغبار شوارعك ماشي وين
زقاق يفتش في زقاق
كتمة وضلمة
وإنعتاق
أنا فيكي لاموني المساجين
سكاتك منازل
حلال الحرام
سكاتك عليّ حين أهش الحمام
سكاتك عليك لما تصحي المسام سكاتك عليهم
سكوت والسلام
صوتك وكت قطع البحر
قّبالمراكب العمدة ضهر النيل عرق
والشمس
فوق حبل القيوم
شرت جلاليب النعاس
ناشف غرب، مبلول شرق
والمطر
زي شفّع العيد.تدخل غرف كل البيوت
حكمة الجوع الشّرح للأرضه كيف تقرأ المرق
وقبال يقع فوقك سقف
يتنحنح الجالوص أمرق علي مهلك
مروق الحناء من ضفر العروس
وأصعد علي مهلل،
صعود البذرة والروح والشموس
مبنيةمدن الخوف من طينة اخر الليل
وأنا في سقالة الشوف قدح البصيرة تقيل
فاتح زيبة الجوف تمرق تخش الخيل
علي كيفها
كيف معلوف
ضهر المظنة يشيل
وانا ظني طنيتوللنيل غريق في النيل
الليل ولا في بالو ليل
ساكت يغنو علي القمر
واجعني في بحر السكات
وسكّتني في الوجع البحر
يابت صباح الطير
وين البلد رّكت
ماعاد هواك يفتح في الكتمة
شباك النزيف
وين تكيتك في الغيمة
شطيف النجوم
ريف الجسد -صدرك-سبلوقة اللبن الحريف
داسيني فيك نضر
والأنبياء فاتوا
وأنبياء بين بين
قاعدين في ضل النار داسيني فيك نضر،وفي الغفلة جو الكفار
طارت حمامة الغار
لاقوني ناشف ومر
ماذنب جلد الطار لو غنو بيهو شتر
ماتخافي الله معاك وكل الملايكة سُمر



أخي الرائع دوما حسام العالم .لوكانت المحبة تبني داخل القلوب بيوتا فأن لك داخل قلبي وطن.

[رشاد العجب]

جمة حشا المغبون
جوفك فعلا جما
زي ضل الهجعا
خليك الزول الروعة
احلة هدية لناس دغرية

[رشاد العجب]

الهدهد:
مخدوش الفضا
طويل الحزن مفتول الحنين
مصاب بالديانات والشرود
نوح:
يبلغ من الطول مسافة يشتهى الغرقان شهيق
لونو زى سرك تكلمبو الصديق
أمو تتوحـّم على طين البحر
قبال تقابل والدو صدفة على الطريق
عمرو ستة شهور حِلِم
إنو الأرض مسجونة فى موية وكل الناس مراكبية
اليابسة فِركة مدخورة لى يوم فيهو ساير النيل
قطـّاع رحط كل الجزاير
والبنات البفتحوا الباب للمطر
وأنا جدولك شارف على كل الجداول الصاحية فيك
والغباش فى دمى منك
لو كسر ضلعين عذرتو
لكن نهر كل العصافير البتلعب فى الوريد
وفنـّاكى جواى زى حجر
والبينـّا ما فات الدوائر
الليل خِمار القمرة مجدوع فى الفراغ
والرقصة لى البت فينا
فوق كل المسامير الندقها فى البساط
والرياح حكـّامة بى دلوكة مرّقت الشياطين منها
إتجنن فقير الحلة دقيناهو بى نفس السياط
كل المجرات النيازك والشُهُب
ودع راميهو الله على السما
والدنيا زار
ويا هدهد هنا مرت مراكب نوح
محملة بالبخور
مين اللى شال من طاقة الطين البعيدة
قنديل حبيبتى وطيـّب الجرح المثير
مين السرق من بابا مفتاحو الملون والصرير
منهوبة مقبرة الفواكه فيكى
قولى معاى يا شرف القبايل جر
الشاف تباريح الطلح فى النار
شافنى مرقت من عندك ضرير
أنا ليه تجينى الموية حفيانة
وأدنقر ألبِّسا شبط أخضر
وأبيت مبلول وأصلِّح فى الرباط
أنا ليه شبابيك البيوت الواجمة والناس البُساط
وليه يرجانى النخل
فى السكة يفتح قلبى خمارة وخلاوى
وبيت بكا
تعبت من المساسقة والهتاف ياغيمة
أتبنى جبهة القمرة
السهر والحمى طول الليل تهضرب
ويا هدهد لقيت أمك
ترشرش فى السعف من عينها
وتجبر خاطرا المكسور عليك
ينكسر خاطر السعف فى إيدا
يا هدهد قيام
من السما الأول قيام
من السما السابع قيام
وأنزل مسافة تهبشك غنوة وأناولك كاس
ومرت مراكب نوح محملة بالملوك
ركعت على الموج الجنود
من كل جندى تفوح ضحية
ودم مشتت فى الأبد
دسيت جبهتى من السجود
بكى فى مخاض الخوف ولد
إشتبهوا فينى ورا الجبل
شافونى دسيت الهداهد بالزبد
صفا !
إنتباه !
وقعت من الهدهد بلد
نهبوها وإتقسموا الحدود
ومرت مراكب نوح محملة بالطيور
واقف مع نوح الغراب
ينضم ويأشر فى إتجاه
باقى الطيور يتوسوسوا
إلاّ الحمام إتوضا مارق للصلاة
القانقرد فى حزنو يغزل شاله من صوف
الطواويس شارّة قمصانا المزركشة فى الضحى
الزرازير بى عراريقا المغبشة جات على
أرجينى يا صالحة !
ومشيت فى الموج
يا النبى نوح أصل سالم
يا النبى نوح أصل
حجر الدُّغُش فى الموية يقلع ضُفرى
يادم !
ده ما وكت الرسم واللون
وجات المغارب حننت إيدا ومشت
سبحانك الأديتنا من حزنك فوانيس
ــ الغراب يا نوح طفش
واليابسة وين ؟
يا الله ما يابس سوى حلقى المجرح بالدعا
طير يا حمام !
ـ الحمام يا نوح يجامل فى السما
وبيّاع مناديل خضرا فى كل العصور
أنا ما خلقتك يا ظنون
شان تبيتى الليل معاى
وتجرى من فوقى الغُطا
ما تشُرّى فى حبلى الوساوس
والمعانى الداكنة والليل والشتا
الهدهد تميمة الموت
معلّق فى بيوت الناس نعش
من خرافاتن تعال
من دياناتن تعال
نفّض نعاسك من كل بيت
من كل حجوة حكوها عنك
فى الليالى الباردة والأطفال نيام
مين يشترينى من الملوك الخايدة فى الدم القديم
مين يوصف بيتنا لى هدهد يتيم
مين النبى القادم؟
من مكة !
أو من دكة !
فى شارع حميم
مين اليوصف للنحل ريق الحبيبة
وحبة القمح التقوم فوق محفضة حبوبة
فى الزمن اللئيم
مزيداً من الطين يا إله
أبنى خوفى عليك ومنك
أبنى آخر بيت حرام
ومرت مراكب نوح محملة بالحجيج
ــ وين ولدك ؟
ــ تركتو على الجبل .
ــ وين بلدك ؟
ــ ضربتها فى مثل .
ــ وين نحن ؟
ــ مرقت على عجل .
يا نوح تخلينا
زيتونك مخلل بالشمس
نار الله والرِجل الغريبة
نحن البلاد الشاكية جرحها للصديد
جاتنا القوافل بالضجيج
جرتنا من حلبة رقيص
ورتنا كيف صلبوا المسيح
ورتنا كيف كتلوا الحسين
وبكينا أكتر منها
ساقتنا فى الآخر عبيد
مين يشترينى من الملوك
الخايدة فى الدم القديم
مين البوصِّف بيتنا لى هدهد يتيم
يا هدهدى المهدود
مين هدهدك نمت
كل الطيور غنت منك يجينى سكوت
مين الهداك للناس
أو هدّ فيك الموت؟
يا أوسم الجايين أنا قلبى حِلّة حنين
والشوق فتحنى بيوت
يا صالحة
لا جنبك لا فتّ منك فوت
دايماً معلق بين
بين الحياة والموت
أدخل ضلام الناس
نورك يجينى خيوط
وقبّال أقع فى الضو
جوّاك سندنى خِفوت
أنا برضى حلة شوق
لكنى فى التابوت
ومرت مراكب نوح محملة بالعبيد
الجنة زى هدهد معلقة فى الكتاب
ونحن العبيد
باب الحياة السرِّى
حرير فى فكرة الدودة الموجعة بالنسيج
وصيوان عزا نوح
المكفّن بالوعود
هدهد يرك فوق دفــّة المركب يدندن
الريح سكن خيمة حريمو الأربعة
النيل رجع فى اللوحة
للوادى القديم
البحار مكتوفة الأيدى
الشموس فاقت
ونوح بعاين فى مفاتن اليابسة
تغسل فى حصا ومتبرجة
سبحانك الأديتنا من ملكك سلاطين وإختفيت
هاك أنبياءك سالمين
وأنزل مسافة توجعك غابة
رقيصنا الحى
طبولنا
وليك شبال
من اليابسة الممشّطة بالملح
وهدهد

[حسام العالم]

ماذنب جلد الطار لو غنو بيهو شتر
ماتخافي الله معاك وكل الملايكة سُمر

ابداع وروعه وجمال ووصف ابعد من اي خيال عادي
لك التحيه وانت تنتقي روائ واروع من درر

[رشاد العجب]

تــانــى الـنـهـارات عـاودتـنـي
وكـان الـخاطر مـاطر ، وشـهوة iiصحو
مــن ويــن عـرفـتني وضـارتـنى
فـــــــــى ضـــــــــو
لا منى ولا منو. والورطني فى الموت لااذكر
غــيـر شــارع وحـمـى الـكـاكاو
ومــــــشــــــيــــــت
- أتــرك فــي الـنـهر كـمـا هـو
يـتفاءل بـيك الـموج ويـشيلوا يدسو بعيد
فـى شـاطىء مـن عين الموت شان ترجع
- مــــوزع بــيــن شــاطـىء
وقـــــــــوز رمــــلــــه
زى قـــــــــريــــــــه
- والـطـيور الـداخـلة فــي دمــك
تـنـقّد بـأرتـياح بـاقـى الـصـباح!!
- يــاتــونــى لا كـالـعـاصـفـة.
يـأتونى زي صَـقَر الـمواعين والـتسوس
- أرجــــــــــــــــاك ؟
- إتـاخـرت قـافـلة خـريفك والـرياح
وأنـــــا فـــــي رصــيـفـك
ومـن قـطارات تـطل من كل شباك أمسيه
وتـدهـسـنـى شــجــرة حــنـاء
وأدخــل فــي أضـافـرين الـغـناوى
وإنـتـى مـاشـه يـعترِّ جـواي أسـف
- تـــــــــعـــــــــال
- ما بجيكي وفى حضن كل المسافات سكتين
وفـى ضـهر كـل الـمشاوير خـنجرين
وفـــى خــيـال خـيـلـك وتـــد
بـــــــلــــــقــــــاك
مــحــل داهــمـنـي الــسـمـاء
وانــا فــي طـريـقي الــي الـغياب
صـارى الـرياح في طرحتك ، وفى طرفي
جـمر الـمستحيل.فوقى مـن دوخة الأرض
أنـــا هــسـه مـديـون لـلـسحاب
والـمـتـعرج فــي جـسـد الـحـله
دا زقـــاق والا وريـــدك أريـــدك
أديـنى صـوابعك ضـارينى مـن الغربة
شــان أرقـص حـبه ، وأهـش نـحلك
حــولـي يـتـفـتح تـوبـى نـوافـذ
واتــسـاقـط يـتـلـقـاني ســمـاء
يـــــــــا مـــحـــبــوب
كـم عام من رغبه وأنت تأجل بيناتنا تساب
كــم عــام إتـعلّق فـي كـتف الـسكه
وصــلـنـا! شــجــر الــحـنـاء
نـلقاك نـيزك فـي رحـم الـكون مبذول
لــلــحــمـي والـــــــدوران
وصــلـنـا !! شــجــر الـحـنـاء
نـلـقاكَ قـطار يـخدش صـمت الـقريه
بـالـضـجـه وريــحــة الـغـربـه
كـم عام من رغبه وإنت تأجل بيناتنا تساب
عـــكّــر ســـكــر قـهـوتـنـا
و أشــــربـــى ودخـــــــن
- الـدنـيا كـانـت مـراهـقه وبـتغمر
إذا فـوقـهـا حـلّـق طـفـل الـفـراش
وانـجـبت انـبـياء بـحـجم الـهـواء
ونــــــــاس لــلــرحــيـل
- يـــــــــا عــــــــاق
نـهـرين فــي دمــك لـلـصحراء !
وبـلـدين فــي نـهـرك يـا ولـدي !!
أحــزانــك جــــواك لــبــلاب
وافــراحـك فـــي كـفـي تـبـلدى
شــقـيـش تـتـكـسـر لـقـطـتـك
دسـيـتـك مــنـك لـــي بــكـره
هـــدهــدتــك حــجــيــتـك
بــت فــي عـيونك ، مـعاكَ وبـدون
خـوفك عـليها يـشيلها ويـغتغت ،فـوقها
ويـحتحت دواخـلك صـفق. تنوم تشتهيها
تـقـوم تـلـقى فـيـها مـنامك صِـدق
ونـمتَ...خلاص إتـمطقتِ بُـهار الـقُدره
وقـــــــــمـــــــــتَ !!
- بـيـناتك وشـجـر الـحـناء الـجواك
سـكـه تـفّـوت جـنازة الـليل الـفيني
دفـنـتـك إتـلـفّـتَ لـقـيتني بــراى
صــــحــــيــــتــــك ..
إتــونـسـنـا عــــن الــمــوت
والــفــرقـه الــفــى الــغـيـب
وتـعيش يـا كـتفتنى بـالخيالات الجموحه
نـدهتَ عـلىّ نـفضت إيـدى من القصيد
وجـيت ، لـقيتك والـملاحم فـي الـوريد
لــلـقـلـب مـــشــوار كــــن
بـابـين وشـبـاك مـرحـلي وهـامـش
حــضـرتَ ولــن أعــود لـلـخلف
-مـــــــــا تْـــســـافــر
هــدّت فـيـك الـسكه وشـجر الـشوك
الــمــوت أداك بــــس اســمـه
بــتـفـتـش لــيــه عــنـوانـو
مـسـكـونـه أنــــا ... بــيــك
وعــرقـانـه عــتـبـة الــبـيـت
خــطـواتـك وإنــــت مــعــاى
مـــنـــديــل ، مـــنــديــل
فــانـوسـك نــومـنـى وســاهـر
أطــــفــــى الــــنــــور.