.::||[ آخر المشاركات ]||::.
يوميات صائم ( بوست خفيف ) الجز... [ الكاتب : البشير دفع الله - آخر الردود : تسامح عثمان يعقوب - عدد الردود : 3 - ]       »     مطار الخرطوم وتكرر سرقات العفش... [ الكاتب : ابوالسنة - آخر الردود : تسامح عثمان يعقوب - عدد الردود : 1 - ]       »     مكتوب لي مقدر [ الكاتب : تسامح عثمان يعقوب - آخر الردود : تسامح عثمان يعقوب - عدد الردود : 0 - ]       »     مبروك المولود رضوى السني وحسا... [ الكاتب : البشير دفع الله - آخر الردود : احمد عقيد - عدد الردود : 10 - ]       »     افطار عضوية جدة [ الكاتب : ابوالسنة - آخر الردود : ود الاراك - عدد الردود : 4 - ]       »     كشافة كسلا تعتمد المكتب الجديد... [ الكاتب : فارس كسلا - آخر الردود : فارس كسلا - عدد الردود : 0 - ]       »     الجمعية العمومية لمفوضية كشافة... [ الكاتب : فارس كسلا - آخر الردود : فارس كسلا - عدد الردود : 0 - ]       »     قررت أن تضع كامرات تراقبها فكا... [ الكاتب : عمار أحمد - آخر الردود : حافظكو - عدد الردود : 1 - ]       »     في ذمة الله شقيقة مشرف المنتدي... [ الكاتب : عبد الواحد خضر - آخر الردود : ود الاراك - عدد الردود : 4 - ]       »     هطوا امطار غزيرة صباح اليوم [ الكاتب : احمد عقيد - آخر الردود : ود الاراك - عدد الردود : 1 - ]       »    



الإهداءات


 
 
العودة   موقع ومنتديات جبل الأولياء | فردوس النيل الأبيض > الأقــســـام الــعـــامــة > منتدى الأغاني > كلمات الأغاني
الرئيسية لوائح وقوانين المنتدى مركز رفع صور خارجي إتصل بنا
 
 

ديوان الشوايقة ( كلمات الأغانى الشايقية )

كلمات الأغاني

إضافة رد
 
 
 
أدوات الموضوع انواع عرض الموضوع
قديم 08-19-2008, 08:42 AM   #1
ميسره عمر
عضو مؤسس
 

افتراضي ديوان الشوايقة ( كلمات الأغانى الشايقية )

ما عارف ابداء من وين ... خلونى ابداء بأغتية تكسر الضلوع وتنزل الدموع ...

ميسره عمر غير متواجد حالياً   رد مع اقتباس
قديم 08-19-2008, 08:49 AM   #2
ميسره عمر
عضو مؤسس
 

افتراضي سوقني معاك يا حمام

كلمات الاستاذ/ محمد الحسن سالم حميد
اداء الفنان / محمد النصرى

سوقني محل ما الحبيبة
قريبة تراعي الغرام
غريبة الأشواق حبيبة
يجيبا منام في منام
... ...
سوقني محل ماالمحنة
وأيادي تقطر سلام
سماحة الحياة فوق أهلنا
وبلادي تقرقر وئام
... ...
غلابه وأمان مو الطيابة
ضكارى بصارى وكرام
حبابه الحبان في بابه
وتدخلوا عليّ الحرام
فقارى ولكن غنايا
غنايا بهذا الغمام
بهذا النيل كم تغايا
وتيرابا نرميهو قام
... ...
إرادة القمره البتقدر
براها تضوي الضلام
شعاع شمشاً ياما خدّر
وإذا يبَّس لا يُلام
... ...
فيابا خرابا الحرابة
وخرابة فكر سوسي سام
خرابة الكل نفسو تأبى
عقابه .. تلِم عم سام
... ...
ولِيد مخلوق للقراية
خزين مدخور للجِسام
تتمر نيتو التخاية
إلاما مذهلل إلام
درب من دم ماب يودي
حرِب سُبّه .. حرب حرام
تشيل وتشيل مابِ تدِّي
عُقب آخرتا إنهزام
... ...
بطانة الشيطان قديمِة
وبعد دا منو العرشو دام
إذا الإنسان ما ليهُ قيمِة
علي إيش خلَّفُو سام وحام
... ...
تعالوا الدم ما هو مويةِ
ولا ها ترايي المسام
أخويا وطراوة الخوة إبتسام
... ...
تعالوا نحانن بعضنا
نخل قلبو على التُمام
نبضنا يشهل أرضنا
وأرضنا تجِم العضام
... ...
تعالوا بدل نبني ساتر
نخيب ظن الصدام
نطَّيب للعازه خاطر
نقوم لأطفاله سام
... ...
أخير كرّاكةً بتفتح
حفير وتراقد الركام
أم الدبابة البتكشح
شخير الموت الزؤام
... ...
تعال لي غابتك يا خيرا
تعال لها يا أسده الهمام
بدل دوشكة يغني طيره
محل قنبلة عش نعام
... ...
بلد صمَّي وشعب واحد
عصية على الإنقسام
أبيه وبكراها واعد
صبية ومشهاده تام
... ...
بساط أحمدي كم يشيلنا
وتشهِّلنا على الدوام
نَقِل ليلنا تقوِّي حيلنا
ودليلنا تمام التمام
... ...
نلقّم سقف المتاهة
نجم هدّاي في الضلام
ونطعِّم حرف النزاهة
لإيئلافك يا حمام
... ...
ديموقراطية وأمان
سوا .. سوا عالين مقام
مواريثنا المن زمان
محصَّنة في أروع نظام
... ...
بريدك يا زول بريدك
بعشقك حتّى الهيام
أريحيتك عد تزيدك
مهابة وليك القيام
... ...
عهدي معاك يا حمام
حبِيْب الرُسل الكرام
رسول الأمراء العظام
عصامي على ما يرام
... ...
ماب تهدِل في خنادق
ولا ب تقدِل فوق حطام
ولا ب تنزل في فنادق
وسطنا مراعيك قُدام
... ...
فيا ملدوغ من أديس
معوَّق في كوكدام
تعال عمِّر فينا ميس
كفانا طشيش الكلام
جناحيك جنوب شمال
وأمش طوِّف يا حمام
محِل غصن العزّة مال
عليك وعليهُو السلام
حكيم الطير يا مهبِّر
شُراكة القَتَلة اللئام
متين بإسم الحق تكبِّر
وبالرحمة تصلِّي إمام
... ...
فلاحة العالم تعمر
محبّة مودة ووئام
تشمِّر ساعد السلام
... ...
سوقني زمن كُلُّو عافي
نتاجو عِلم خيرو عام
بري آيمة من المنافي
وطن وافي على الدوام

ميسره عمر غير متواجد حالياً   رد مع اقتباس
قديم 08-19-2008, 11:20 AM   #3
ميسره عمر
عضو مؤسس
 

افتراضي امونة بت الشيخ حمد

كلمات / حميد (محمد الحسن حسن سالم)
اداء / عثمان اليمني

امونة بت الشيخ حمد ابوها كان
مزواج خلاص ناسب جميع أهل البلد
ميلادها كان عرسا كبير
هيبة ورقيص ماليها حد
يوم السماية اتيتمت
وحس القدر في الام نفد
جرت السنين واتفاوتت
بيناتنا ما ليهن عدد
امونة كبرت واستوت

فار الصدير شال النهد
وبقت أمل كل الشباب
وجمالها في بت ما اتوجد
في مرة رفا قليبها يوم

حبت قريب الشيخ حمد
وأظن كمان حباها هو
جوه الضلوع للخيط سرد
كم من غرام في القلوب
ولع لهيبو ما برد
خايفين عيون الناس تشوف
والخبر يملا البلد
والحب هناك عيباً كبير
لا بت تبوحبو ولا ولد
سنتين تلاتة مضت خلاص
والبت حياتها بقت ند
برضو الولد زي حالتو ديك
وقليبو داك مكتول كمد
في يوم ابوها ضحك كتير
برم شواربو بلا الاسد

ناداها امنة تعالي جاي
فوق البرش ربع قعد
قالتلو هوى جايك خلاص
وقليبها فر وما رقد
هابت عيونو قبل يقول
شافت وجيهو عليهو جد
حاج الخضر عارفاه داك
قالتلو أيوه ابو سند
جانى الصباح طالب يديك
داير نسب شيخ البلد
وانا قتلو مرحب بيك تعال
يومين تلاتة يكون عقد
راجلاً عظيم عنده القروش
عنده الحديد راقد لبد
كمان كريم واخو رجال
ماعونو فد يوم ما برد
جرت الدموع من عينا شو
وأبت تديه رد
وكتين غلب يا ناس خلاص
ولع فؤاده جمر وقد
فكر سكوت البت رضا
جاب زولو لما الناس عقد
والمال ده خمخم والحرير
تحت الرجول مدوه مد
دق الدليب صحا العيون
ما خلا فد مخلوق غمد
يوم الصفاح والناس تجوط
بالفرحة مقلوبة البلد
أمونة تبكي بكي السواد
بدل الفرح جاها النكد
وبشيشها قامت للمروق
في الزفه ما حسابها حد
كان الحبيب راقد هناك
والصدمة قاده قليبو قد
حاضن ربايتو وحيد ينوح

كم جرا للمسدار جبد
وقفت قصاده بكت كتير
لامن دميع العين جمد
قالتلو ما بيدى شىء ديل
ناس ابوى وأبو سند
أتلمو سوهو الكلام وانا
لا رضيت لا جبت رد
قال عنده مالاً مو قليل
وأبوى شاف المال سجد
وأداني للراجل العجوز
المن عروقو الدم شرد
قايلنى بسعد بالقروش
والله المراح الفات ورد
لاكن محال اسعد بلاك
كان السماء ينهد هد
بديك قلبي وروحي ليك
وبعيش هناك صورة وجسد
اتراجعت دارت تعود
لكن قليبها رجع رفض
مسكت دريباً مو غريب
كم بيه صف بنوت ورد
قاصدة البحر داير تموت
لا عيشه لا هم لا نكد
شافت مسار النيل حزين
حتى النخيل حزنان خمد
وبشيشها فككت الحرير
لا زينة لا ربيط عقد
ما دام حياتها بقت دموع
وقليبها من زولا انفرد
قالت اخير ارتاح خلاص
أرسى وشقاي القالو حد
وفي لحظة موج النيل علا
وفي جوفو غابت للأبد

ميسره عمر غير متواجد حالياً   رد مع اقتباس
قديم 08-19-2008, 11:22 AM   #4
ميسره عمر
عضو مؤسس
 

افتراضي بحر المؤدة

كلمات / السر عثمان الطيب
اداء / محمد جبارة


شوفي الزمن يا يمه ساقني بعيد خلاص
در درني واتغربت واتبهدلت وريني الخلاص
ساقني القدر منك بعيد لآذيا كاس جرعني كاس
يا يمه يا فيض الحنان الما كمل
يا يمه يا بدري البشع دايماً يهل
يا يمه يا نور الصباح وكتين يطل
وآشري يا زينوبة ولدك في بحور الشوق كتل
محروم من الحب والمحنة وراك همل
يا يمة يا بحر المودة وكتين يفيض
يا يمة يا شعلة أمل زادت وميض
يا يمة يا عنقود كلام منظوم قصيد
يا يمه يا نغماً حنين بالشوق يرن
وأفكاري فيهو بيرتعن … دمعاتي شانو بينزلن
واتذكر يا يمه في الدغش النسايمو يهبهبن
قايمي الصباح متكفلتي شايلي الحليلي علي المراح
والساعة ديك يا دوب ديكنا بدأ الصياح
والطير صغاروا يغردن
جبتي اللبن بي انشراح
واتذكر يا يمه في وكت الهجير
صالياك نار الدوكي عستيلنا الفطير
رشيتي قلتي أكلوهو خير
واتذكر يا يمه يا بسمة الطفل الغرير
وكت الخلوق ترقد تنوم وأسهر براي
أرعي النجوم
والشوق يرف جنحيهو بي فوق لي يحوم
وأهتف باسمك في الخيال
طيفك كمان بي فوقي جال
وأتمني لو لحظات يدوم لكني فجأة ألقاهو زال
واتذكر يا يمه ساعة الناس يجونا من البلد
ناعم ترابه علي جسيماتن رقد
ريحة التمر فوق الهدوم
ولون الخضار خانس لبد
والشوق أوارو بيشتعل
كان ظني فيهو يكون خمد
واتذكر يا يمة والناس قالوا راجعين البلد
رصوا الهديمات عدلوا ركبوا اللواري وقبلوا
خلونى وحيدى بلا انيس
كيف إنفرادى إتحملوا
شالوا السلام من عندى ليك
وإن شاءالله عندك يوصلو
يايمه ساعت يوصلوا ويقولو ليك
شفناه فى بلد فى بلد الأمان
انبسطى يا نبع الحنان
وانا حالى يشهدبوا الزمان
يايمه رسلى لى عفوك
ينجينى من جور الزمان
...

ميسره عمر غير متواجد حالياً   رد مع اقتباس
قديم 08-19-2008, 12:22 PM   #5
البشير دفع الله
المدير العام
 
الصورة الرمزية البشير دفع الله
 

افتراضي

العزيز ابو عمر
تحياتي وتقديري
يا زول بالغت عديييييييييييل
براحة على الناس ديل

تعرف قصيدة امونة بت الشيخ حمد بفتش ليها لي زمن
كل الود

التوقيع: كن كشجرة الصندل تعطر فأس قاطعها
البشير دفع الله غير متواجد حالياً   رد مع اقتباس
قديم 08-24-2008, 03:40 PM   #6
بشير الهادي
عضو ذهبي
 
الصورة الرمزية بشير الهادي
 

افتراضي

دا ما القلب البجرسو شوق

دا ما القلب البجرسو شوق ** اذا ما اختار سميرو بعاد
ولا القلب التبكي حبيبه ** لو غابت عن الميعاد
قلب بالصح دا ما القلب البجرسو شوق

قلب من قام صحاري الواحد كان يشقهن بالنوق
محكوم بسياج العفه فد يوم ما سرح مطلوق
شيال للتقيل مانحا لو ساق العمر ارقوق
ندي ورياد كريم واجواد الا من الضعف معتوق
دا قلبي نيل وكلو جمال ومابيحقد علي مخلوق
ومهما جرحو المحبوب وخلا حشاهو كلو شقوق
كتوم من قام يضاحك غيرو صابر والجرح مفتوق
عليه اب يضحكوا الشمات وتجري دموعو روق فوق روق
حكيم يعرف متين يرتاح وينسي شقاهو يصفي يروق
ومتين يعكر يكون فيضان ويبقي علي الزرع خازوق
فشكرا ياحبيب الروح عليه روادك المطبوق
انا ان حبيت بقدس زولي وان فارق بفوت بي زوق

الا بيبكي لما يشوف مابين الخلق في خلوق
ماخده طباعا من الغابه شايلي ضميرا ماشي السوق
وتاني بيبكي لما يشوف مابين الحقوق في حقوق
نزلت من سماها زلال وطارت من تحت لفوق

وداعا وما بقول بنساك وداعا القلب مخنوق
وداعا وفي الختام دنياك مناي وراي تسوي القوق
تمدلك السعاده ايدينا لفردوسا ليك تسوق
وسيبني اعيش قسمتي وراك باسم والكبد محروق

بشير الهادي غير متواجد حالياً   رد مع اقتباس
قديم 08-25-2008, 03:49 PM   #7
تيسير
عضو مشارك
 

افتراضي

أمــل وألـــم
كلمات : علاء الدين ابسير


مين القال الدنيا بخيلة وديمة تشيل أبداً ما بتدي ؟
طبع الدنيا متِل ما قالوا زي الموجه تجيب وتودي
زي ما الفرح أيامو جميلة بتمشي بسرعة بدون ما تهدي
الأحزان تتنسي لحظاته وبرضو تقضي أيام وتعدي
*** *** ***
حزنت كل الدنيا عليه لمان مات الحاج (ود احمد)
يتم خمسة صغار يتباكوا أكبر واحد إسمو (محمد)
بعدو (أميرة) و (أمجد) و (سامي) وأصغر واحد فيهم (أحمد)
رمَّل (فاطمة) الباكية عليهو ونار أحزانه أبت ما تخمد
قعدت ومسكت راسه تمنح وتبكي الزمن الجاير وأسود
كيفن أقدر أشيل الشيلة أصلو الحال سجمان ومرمد
وكيف يا خويا تسيبني برايا في نص ليل وأمواج ورعد
حست بي أيدين ضاماها وحركة زول قدامه قعد
رفعت عينه تشوف الحاصل كان قدامه وليده (محمد)
قالها يُمه أنا عاوزك تصبري وأعرفي أنو جد وقت الجد
ليشن زغردوا ناس الحلة لمان قالوا ولدتي ولد
صغير أنا يمكن بس لكين في الحارّه الشبل بيستأسد
بشيل الشيلة علي لا تخافي بس دعواتك لي َّ مدد
بعود يا يمه الفرح الضاع مهما إتغيب وطالبو أمد
وفعلاً خلَّ المدرسة سافر وللأرزاق ما خلا بلد
والله أجاب لي دعوات أمو بقاله وليده يمين وسند
وكان بت عمو (أمل) شايفاه فتي الأحلام وبطل الغد
وكانت أمل الكل في الحلة جمال متميز وفايت الحد
تحبو وكل ما مرت سيرتو بتلقى خياله معاهُ شرد
وكل ما تحاول تكتب ليهُ آخر لحظة تخاف تتردد
تقولوا إتكلم وريح قلبي انا مبعا بت وأنت ولد
وكيف البت تتطاول وتعشق ويبقى سكات الولد الرد
كيفن تسكت ولي تتجاهل ويبقى أخير ملاك (السيد)
الدرويش الزاهد وهامل لا عندو أهل لا عندو بلد
الدرويش الجابو الشارع وفي زاوية حلتنا قعد
يسقي الشتل الضال بي جوزو ولي أزيار الزاوية إتجند
تقولو تعال بخطبلك أملَ معاى أخدم يتخيلو جد
تلقى حرت لك إنقايتين وبوَق وتيلن ومارن وسنَّد
ويومو اليبقى جعان ومفلس وسط الناس ينضارى ويشحد
وكلما شِلت صفيح للموية توتل جوزو معاي ورد
يحكي لي عن حبو وريدو وليهو سنين بس راجي الرد
وأنت سكاتك طال يا غالي وأنا راجاك مستني وعد
آخر يوم في إجازتو مشاله حكاله ظروفو وليها سرد
إنو الحالة مِتل ماك عارفه خليط ممزوج من فرح ونكد
يوم الفرحة تطير بالواحد ويوم أحزان وسهاد وكمد
وأول فرحة تعطر بيتنا يوم ما إتخرج وسافر (أمجد)
قال في الغربة بحقق حلمو وفيها طريق أحلامو معبد
بس نستنَ (أميرة) تكمل وأفرح بيك وبي حبنا نسعد
وتبقى الدنيا إبتسمت لينا وليك بتقدم وما بتردد
وخلي البينا يكون بيناتنا وسوي ضلوعك للريد سد
وسافر وعاد لي شغلو محمل بي إحساس أخضرَّ ورفهد
سنين عشرين من عمرو تمر مما سافر ويمكن أزيد
ما ضاق فيها حلات النوم ولا مرتاح فد مره هجد
وبنيت عمو هناك منتظرة والعرسان كل يوم تتردد
يناجي خياله يقولها أصبري لا ناسيك لا شوقي برد
قريب ألقاكى وأبل الشوق ويبقى لقاي لي حُزنك حد
*****
يوم جابولو جواب مستعجل فتحو ولي صفحاتو فرد
لقا جواهُ الما متوقع وآخر شي في عقلو ورد
سيل الدهشة جرف تفكيرو ولي لحظات بي عقلو شرد
طول الليل راقد سهران لا جاه النوم لا لحظة غمد
قرر بكره يسافر بدري ولما يعود حيكتب الرد
ولمن صبحت كان في اللوري حجز قدام في الكرسي قعد
وصل البيت الطوَّل منو بعد ما إستن وصبرو نفد
سالم خالتو وعمتو (زينب) وبالأحضان لي أمو قلد
حكى بالحاصل ليهم كلو ولي مضمون القصة سرد
إنو الجابو أمر مستعجل تفصح عنو رسالة من (أمجد)
كاتب قال نخطبلو بسرعة وحدد لي بت عمو قصد
قامت عمتو (زينب) فاتت لي بيت عمو تجيب الرد
أمل قالتلها خير يا عمة دون ما تفكر أو تتردد
ضمته عمتها قالت ليها إنشاء الله يكون بيت مال وسعد
إنتي جميلة بتملي العين وبرضو مهذب ورايق (أمجد)
سكتت لحظة وقالت تضحك عمتي غلطت قالت (أمجد)
(أمجد) مين يا عمتي صلي الإتقدم أخوه (محمد)
قالت عمته لا لا الدايرك ورسل خطبك (أمجد)
ويلا معايا براك بي نفسك شان ما نمشي هناك نتأكد
ولما (محمد) أكد ليها كان إنهارت وحيله برد
قالها (أمجد) فعلاً عاوزك ودمعو يكبكب فوق الخد
عشانو بضحي بأعظم حاجة ولو الحلم عشانو إتبدد
إنتي الروح بهديك إياهو وراضي أموت لو بيكي بيسعد
أنا المهدت طريق أفراحو كيف في يوم أجي أكون السد
ديل أخواني الأنا ربيتم وريدي أنا ليهم ما بتحدد
أنا خليت الدنيا عشانم وضقت عشانم ويل ونكد
ولو بتقسم فوقم عمري بقسمو فوقم ومابتردد
ونحن خلاص أصبحنا أخوان والموضوع بيناتنا أتعقد
كيفن ترفضي (أمجد) وترجعي عاد تنتظري (محمد)
واقفة (أمل) قدامو وتسمع ودمع العين في عينه جمد
كأنو إغتال الشوق العارم ولي أفراح جواها وئد
قالت كيف إتهنى بدونك وكيف في الدنيا بدونك أسعد
جرح الليد سرعان ما يبرأ وجرح الجوف كيفن يتضمد
وقلبي العشقك كده يستاهل إنو يعيش طول عمرو مشرد
وفاتت خلتو واقف ينضم ساهية وسارحه وباله شرد
وكان الريح تنهر بي بره هبوب وأمطار وبروق ورعد
والسكان من بدري إتلمو وكل واحد في بيتو هجد
ترجف وتبكي مباري الحيطة نص الليل كان قاصدي (السيد)
كان في الزاوية رقد هلكان راح في النوم لي إيدو إتوسد
متفرشلو دلق شوال جنب الحيطة رقد وإتمدد
صحتو قام مخلوع من نومو من قدامه بسرعة شرد
قالتلو رضيت بك وبكرة نعرس ما صدق بالهجمة قعد
وفعلاً بكرة بلا زغريد جاب شاهدين وعليها عقد
وبكت الحلة عليها هي حية وعاشت يومه دموع ونكد
وبكى بي حرقه وسافر وراجع جاري زيول الخيبة (محمد)
كتم الحزن العايش فيهُ وحكى بالحاصل كلم (أمجد)
قالو قسمت البت لي غيرك وكلو نصيب مكتوب ومقيد
خبر (السيد) وامل اتوزع بين الناس إنزاع واتردد
إنها عاشت في تعذيب والعبرات إنقلبو غدد
وإنو قليبه على الأحزان والالآم بالحيل إتعود
ويومه الفرحت وجابت بت حزنت تاني ومات (السيد)
ويوم الصدقة سمايتة كانت قالو الناس سموها (شهد)
وبعد سنتين إتحكى بالصدفة وفي الحاضرين كان قاعد (أمجد)
عرف القصة تدور حوالينو وقف الدم في جسمو جمد
كِره الدنيا وكِره الفيها وبكى وإتألم ولحق الحد
قاعد يبكي ويبكي ويبكي لمن غاب ولي وعيو فقد
كيفن أخوي الضحى وعانا عشاني إتبهدل وحلمو إتبدد
وكيفن أكون أنا سبب أحزانو وكيفن أكون لي فرحو لحد
دا المن قام ما غلط حاشا ولا بي حاجة على جحد
بعد يومين رجع السودان دون إنذار أو سابق وعد
عانق أخوه عناق مشتاق لي محبوبو أحضانو فرد
قالوا أنا عايزك توعدني وتحلف وتقسم ولي تتعهد
إنك إنت و (أمل) تتراضو وعهد الريد المات يتجدد
وبينك وبينه يعود الماضي ويحيا شرار الريد الهبد
هِن حلين يا أرجع أسع ولا كمان في عقدك أشهد
أخيراً وافق أخوه وخاصة بعد ما العودة طريقة إتمهد
وعاد من تاني فتى الأحلام وللمحبوبة العود أحمد
عادو وعاد الفرح الغاب وعاد من تاني وإتجدد
وفوق راس بيتم غنَّ القمري رقص طربان غنَّ وغرد
ونخل الحلة رقص فرحان مال طربان سل وجبد
وقعدو سوا الإتنين في الكوشة وكان بيناتم قاعدة (شهد)
بسمته ضاوية أطراف الدارة وختت فوق كل واحد يد
رسمت لوحة حلم اللقيا بي تحنان في أروع مشهد
وكل الناس بالفرحة إتباكو وكل إنسان للتاني قلد
وكانت (أمل) القمر الضاوي وكل الشافه وقف وإتشهد
وكان الفرح الفي عينيها دون ما تحسبو غنَّ وردد
زي ما الدنيا أحزانه كثيرة الأفراح ما ليها عدد

تيسير غير متواجد حالياً   رد مع اقتباس
قديم 08-30-2008, 04:29 PM   #8
التاج مختار الفكي التاج
عضو ذهبي
 
الصورة الرمزية التاج مختار الفكي التاج
 

Talking الشوايقة

الشوايقة كلماتم رصينه و هادفه لانها تنبع من مأساة

التوقيع:
علمتني الحياة أن أجعل قلبي مدينه بيوتها المحبة

وطرقها التسامح والعفو وأن أعطي ولا أنتظر الرد على العطاء

وأن أصدق مع نفسي قبل أن أطلب من أحد أن يفهمني وعلمتني

أن لا أندم على شي وأن أجعل الأمل مصباحا يرافقني في كل مكان
التاج مختار الفكي التاج غير متواجد حالياً   رد مع اقتباس
قديم 09-06-2008, 02:10 AM   #9
إيمان
عضو مشارك
 
الصورة الرمزية إيمان
 

افتراضي صبرية

كلمات الشاعر : خالد شقوري

غناء الفنان محمد النصري


طفت اطراف الفيافي شلت صبحي وليلـي حافـي
مانسيت ارد القوافـي زي طعـم صبريـه مافـي
زي عشم صبريه مافي زي نغـم صبريـه مافـي
شافعي من عربان بلدنـا منهـا وفيهـا الوداعـه
شتله في قيـزان بلدنـا قايمـي بايـده وضراعـه
القديم اللافه طرقي زاهـي فـي روعـة طباعـه
البسيمات في وجيها الباهي من زمـن الرضاعـه
فاقعي زي شمس العصاري في العمر باقي له ساعه
في القليب الشايله صافي زي صفا صبريـه مافـي
في الهجير راحت تدقق فـي النهارالحـار تـورق
للهدوم بــالــلــيــل تـــلـــتـــق
في الجرف زارعه له حوض راجي قبل الحين يبتق
والبسالمه من بلدنـا هـي تقولـو انـشالله عافـي
زي كلام صبريه مافي وزي سلام صبريـه مافـي
في كريقة خاله احمـد شايلـه ليلـه وايـده تنبـح
شوكي لاقته في دريبه لما كـان بالمعـز تسـرح
نامـت المسكينـي تقنـت والفوينيـس زادو روح
باقي تمتمه في خشيمه تسـال الله المسـره تنجـح
ماله مال المسره إلا شان حبيـب روحـه يفـرح
دي البنيه الريده وافي زي غـرام صبريـه مافـي
زي شعور صبريه مافي زي غرام صبريه مافـي
رادت النـاس السمـر رادت الصـفـا والعـكـر
رادت المـوج الهـدر ردات الحـلـه وبيـوتـه
في عيون صبريـه طلـت ريـدة الخـلا للبحـر
نافري من قيلة الكرارق وخايفي من قولـة السفـر
والرحيل السرو خافي فـي قلـب صبريـه مافـي
في زمن صبريه مافي وفي خيال صبريـه مافـي
والنهـايـه الـمـن فـصـول سـيـرة البنـيـه
لمـا عـادت للبيـوت الكانـو قبـل المغربـيـه
مالقـت غيـر الزوامـل شايلـه احـلام الصبيـه
شايلي عيدان الكرراق فـي الصباحـات والعشيـه
ضاربي بطن الوادي زفه لمـت النـاس والسعيـه
والمطيره الضاربي قبلي لاقـت الدمعـه العصيـه
والرحيل عـز البـوداي الرحيـل وجـع البنيـه
زي رحيل صبريه مافي ِ زي سفر صبريه مافـي
زي حــلـــم صـبــريــه مــافـــي

إيمان غير متواجد حالياً   رد مع اقتباس
قديم 09-07-2008, 02:42 AM   #10
إيمان
عضو مشارك
 
الصورة الرمزية إيمان
 

افتراضي رسالة

رسالة
الشاعر : خالد شقوري
غناء : محمد النصري

وقفت بعد حلبت لبينة الشاي تكورك يا الحسن
يا ام الحسن وينو الحسن
ولمن صفت رغوة شخيبات اللبن في حلتا المبنية من طبق السكن
واقفه في حوش البهايم ولسع تكورك يا الحسن
جاها حسا من بعيد مارق من القاطوع ورا
قال ليها خير يا الحاجه خير
قالتلو خير تعال لي جاي دايراك تعنون لي جواب يا الراسي لي ولدي الخدير
لا تبقي زي شافع السرير يقول لي زين آيمة زين وزين تبقي بعد شهير
وان جاني يكتب فد سطير
اقولو يا سجم السجم انا زي قرايتك ما قريت لكن عويناتي بيفرزن الوريقة البيضاء من لون القلم
بعد المغيرب بي شوي جاها الحسن تعبان يسير
دا العشى غنمو من الدرب وسرقت ندي وشو الهجير
سوتلو شايا بي لبن قرض معاهو حرف فطير
قالتلو بسم الله قول واكتب وصيتي انا للخدير
الزمن يا ولدي ماحقاهو السنين
البعيش في الدنيا ما بعيش مرتين
العمير فاضل لي بس منو اليقين
وانت طول(ت) في البنادر يا الحبيب لا متين
تعال اوريك حق ابوك الجم حقيق حاج اللمين
ان عرفتو بلا عمار يقولو ولدا عندو طين
العلاج لا تنسي رسلو لي دحين
العوينات يا جناي شوفن ضنين
سلامنا ليك مطرز للبنيات والبنين
ولو الارض يا ولدي تنشال في الايدين انا كت برسلا ليك
في لوري الخزين

إيمان غير متواجد حالياً   رد مع اقتباس
 
 
إضافة رد
 
 
الكلمات الدلالية (Tags)
الأغاني, الشايقية, الشوايقة, ديوان, كلمات
 
 

« الموضوع السابق | الموضوع التالي »

الذين يشاهدون محتوى الموضوع الآن : 2 ( الأعضاء 0 والزوار 2)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 04:55 AM.


Powered by vBulletin® Version 3.8.8 Beta 2
Copyright ©2000 - 2014, vBulletin Solutions, Inc.
المشاركات والآراء المنشورة في منتديات جبل الأولياء | فردوس النيل الأبيض سواء كانت بأسماء حقيقية أو مستعارة تـمـثـل وجهة نظر كاتبها