.::||[ آخر المشاركات ]||::.
تكوين اللجان المتخصصة لهيئة تن... [ الكاتب : نزار شلعي - آخر الردود : نزار شلعي - عدد الردود : 0 - ]       »     إنا لله وإنا إليه راجعون [ الكاتب : بكري - آخر الردود : عبد الواحد خضر - عدد الردود : 2 - ]       »     سمعتن عن ام الصبيان [ الكاتب : ايناس - آخر الردود : بت المسيد - عدد الردود : 5 - ]       »     جديده لنج [ الكاتب : ابو الاء - آخر الردود : بت المسيد - عدد الردود : 60 - ]       »     قررت أن تضع كامرات تراقبها فكا... [ الكاتب : عمار أحمد - آخر الردود : بت المسيد - عدد الردود : 3 - ]       »     حدائق محلية شرق النيل والموت ا... [ الكاتب : أبو اواب - آخر الردود : أبو اواب - عدد الردود : 0 - ]       »     مرحبا نانا [ الكاتب : حسام العالم - آخر الردود : حسام العالم - عدد الردود : 0 - ]       »     ضيوف الرحمن يتقدمون بشكوى لوزا... [ الكاتب : مساء - آخر الردود : حسام العالم - عدد الردود : 2 - ]       »     اشواقي لجبل الأولياء [ الكاتب : شبو - آخر الردود : شبو - عدد الردود : 10 - ]       »     حق الولف [ الكاتب : ابوالسنة - آخر الردود : البشير دفع الله - عدد الردود : 1 - ]       »    



الإهداءات


 
 
العودة   موقع ومنتديات جبل الأولياء | فردوس النيل الأبيض > الأقــســـام الــعـــامــة > منتدى الأدب والخواطر والأقوال والحكم > مكتبات الشعراء
الرئيسية لوائح وقوانين المنتدى مركز رفع صور خارجي إتصل بنا
 
 
مكتبات الشعراء قصائد و دواوين الشعراء السودانيين والعرب

مكتبة الشاعرة نضال حسن الحاج ..

مكتبات الشعراء

إضافة رد
 
 
 
أدوات الموضوع انواع عرض الموضوع
قديم 03-09-2012, 02:10 AM   #1
فاطمة التيجاني عبدالله
مشرفة منتدى الأدب والخواطر
 
الصورة الرمزية فاطمة التيجاني عبدالله
 

افتراضي مكتبة الشاعرة نضال حسن الحاج ..


التوقيع:
المحبة في الله سفينة مبحرة في بحر الإخاء
مرساها عند أبواب الجنة
يقول ابن القيم: ( إذا تقاربت القلوب فلا يضر
تباعد الأبدان ) 0000
فاطمة التيجاني عبدالله غير متواجد حالياً   رد مع اقتباس
قديم 03-09-2012, 02:11 AM   #2
فاطمة التيجاني عبدالله
مشرفة منتدى الأدب والخواطر
 
الصورة الرمزية فاطمة التيجاني عبدالله
 

افتراضي

[align=center]انا بكرهك
بس بكرهك
انا بكره اليوم الصنع قلبا يكورك ويندهك
انا بكره الوطن البلم شرف الغرام المنتهك
من ياتو باب طليت علي ما كنت اصلا بشبهك
انا بكرهك
انا شلت ريدك في القليب وسقيتو من دم العروق
صنقعت دليت النجم دنقرت كبيت نور وشوق
وعصرت موية الانتظار ختيتا في وجع الحروق
وكان النتيجة تبيع هوي هو اريتو كان سويتلو سوق
انا بكرهك
من وين اجيب ليك الدموع
من وين اصنقر حيل كلام كان امنيات قلبو الرجوع
من وين اذا هتك الضلام حيل خيلي القالك شموع
لكني مجبور اطردك واقفل وراك باب الضلوع
شديت رحالاتي ومشيت وكتين هتك حيلك هواي
ارتحت في موجي ورسيت
لا حرك الموج البحر
لا صد قلبي ولا قسيت لكن طلعت خيال عشم
ضمخ رؤى الوجع المميت[/align]

التوقيع:
المحبة في الله سفينة مبحرة في بحر الإخاء
مرساها عند أبواب الجنة
يقول ابن القيم: ( إذا تقاربت القلوب فلا يضر
تباعد الأبدان ) 0000
فاطمة التيجاني عبدالله غير متواجد حالياً   رد مع اقتباس
قديم 03-09-2012, 02:12 AM   #3
فاطمة التيجاني عبدالله
مشرفة منتدى الأدب والخواطر
 
الصورة الرمزية فاطمة التيجاني عبدالله
 

افتراضي

[align=center]انا بكرهك
قدر اشتهاي
انا بكرهك
قدر الغرام الكان زمان كابت مساماتي وهواي
انا بكرهك
قدر اني ما لودت بيك كريات شراييني ودماي
انا بكرهك
قدر اني غنيتك غناي
من وين دخلت علي مدن شاخت من الوجع الاليم
من وين طرقت جدار قلب لقح هوى العشق العقيم
من وين سخت شمسك علي
كانت سماي مليانة غيم
فتق جراحــاتي
فتق جراحاتي وامش
خليني في لهب الجحيم
انا قلت ليك..
انا بكرهك

قدر المواسم الشادة خيل الريد عليك
انا بكرهك
قدر المصائب الحارسة بوابات مجيك
انا بكرهك
نفس المساحة وحجم قلبي الكان تملي بيشتهيك
بقى بكرهك
واتوكل ارحل مني فوت
حرمان علي قلبي الكلام
كان غيرك اجتاحو السكوت
خليهو قلبي الاندفن
تنسج عليه العنكبوت
اوخلي.... من بعدك يموت
الموت اخير......
من اني افضل
في رحابك وفي رجاك
انا كنت لو غاب القمر دائما بضوي
ضلام دناك
وانا كنت لو غيمك رحل
بطلع عشان اسكن سماك
وانا كنت لو بردك نزل
بوقد صوابعي لهب حداك
لكن منو القدر كدا
والله لو انا في محلك
بنسج الشمس احترام
واهديها ليك متمددة
بفتح كراريس الكلام
اختار حروفي واجردا
بنبش قبور المستحيل
كلمات شكر متفردا
لكن خسارة على قلب
حباك بلا ما يعرفك
انعل ابو القلم العلي دفتر غناك دمو انسفك
انعل ابو الشعر الغشاني وغنى فيك والفك
منعول غناي
منعول غناي كان ما امتطيت خيلي وبقيت اتاسفك
بتاسفك وكتين عيوني بسوقن الشوق لي انتظارك
لما ليلي يسوق محاسنو وينهزم عندك نهارك
لما ابكي انهزامي عشان ابارك انتصارك
لما كوكبي ساب مدارو رحل عشان يسكن مدارك
كنت مالي زمان ومالك
لكن وحاتك بكرهك
ندمان
ندمان على عمرا معاك ضيعتو
ضيعتو في غفلة زمن
ندمان علي
دمعا سكبتو على رضاك بلا تمن
انا كنت بحلم في وجودك ينكسر خاطر الشجن
لكن رضاي عليك عشم ابليس قصاد جنة عدن
[/align]

التوقيع:
المحبة في الله سفينة مبحرة في بحر الإخاء
مرساها عند أبواب الجنة
يقول ابن القيم: ( إذا تقاربت القلوب فلا يضر
تباعد الأبدان ) 0000

التعديل الأخير تم بواسطة فاطمة التيجاني عبدالله ; 03-09-2012 الساعة 02:17 AM.
فاطمة التيجاني عبدالله غير متواجد حالياً   رد مع اقتباس
قديم 03-09-2012, 02:17 AM   #4
فاطمة التيجاني عبدالله
مشرفة منتدى الأدب والخواطر
 
الصورة الرمزية فاطمة التيجاني عبدالله
 

افتراضي

[align=center]انا بكرهك
كلما يطول ليلي ويواتيه العذاب
انا بكرهك
كل ما القلم يركب مصاعب الدنيا
يمشي على الكتاب
انا بكرهك
كل ما الفراق كتل مضامين العشق سدالو باب
انا بكرهك
قدر العيون ما تلبس التوب الزراق
تتوضأ موية الانتحاب
انا بكرهك

من كل باب انا بكرهك
واتوكل ارحل من جواي
غلطان اذا قلبك هداك قال ليك حا تفضل غناي
غلطان اذا عقلك رضخ لي ظن يقول انك حداي
والله ما فارق معاي
انا كنت ناوي اجملك
بس كنت ناوي اجملك
وامسك مضامين اللغات
من فيض حروفي اكملك
ترحل علي درب العشم
بي زاد هواي احملك
وكتين اخش قلبك جراح
واقطع قليبي وادملك
ندمان منو
انا غايتو ما ندمان عليك
اتوكل ارحل من جواي عيش العذاب الباقي فيك
ولو قلبك اتجرأ رجع
حقك تلومو علي مجيك
شان قلبي انت مليتو دم
ياخ فلبي انت مليتو دم
ما عادلو باقي يسبو ليك
على كل حال
انا بكرهك
عدد الحصى وعدد الرمال
انا بكرهك
عدد الصواب والاحتمال
انا بكرهك
عدد الحقائق والخيال
انا بكرهك
عد الشنة وعدد الجمال
انا بكرهك
عدد الاجابات والسؤال
انا ابكرهك
عدد الشعر ماسنة سيف الارتجال
انا بكرهك
عدد اللي ممكن والمحال
انا بكرهك
عد ما زمان قت ليك تعال
انا بكرهك

مستورة حالي وراك وفوت
يا دابو ليلك همو طال
مستورة حالي وراك وفوت
يا دابو ليلك همو طال
عاى كل حال
انا بكرهك
[/align]

التوقيع:
المحبة في الله سفينة مبحرة في بحر الإخاء
مرساها عند أبواب الجنة
يقول ابن القيم: ( إذا تقاربت القلوب فلا يضر
تباعد الأبدان ) 0000
فاطمة التيجاني عبدالله غير متواجد حالياً   رد مع اقتباس
قديم 03-09-2012, 04:56 AM   #5
ربيع حمامه
مشرف منتدى الرياضة المحلية والعالمية
 
الصورة الرمزية ربيع حمامه
 

افتراضي

سمعناه بس ماعرفنا البكره منو انتي ولا هي وبتكره شنو فاطنه البحب عمرو ما بيكره ولا عندك راي اخر
التحيه للشاعرة نضال حلوة النضم

التوقيع: انا لا ادعو الي غير الصراط المستقيم
ولا اهجو الا كل معتد اثيم
انا ارفض ان تصبح الارض غابة تمرح فيها العصابة
تنعم في العليا بجنات النعيم
وعامة الشعب في قاع الجحيم
ربيع حمامه غير متواجد حالياً   رد مع اقتباس
قديم 03-09-2012, 01:43 PM   #6
فاطمة التيجاني عبدالله
مشرفة منتدى الأدب والخواطر
 
الصورة الرمزية فاطمة التيجاني عبدالله
 

افتراضي

[align=center]
اقتباس:
المشاركة الأصلية كتبت بواسطة عيون ايراع مشاهدة المشاركة
سمعناه بس ماعرفنا البكره منو انتي ولا هي وبتكره شنو فاطنه البحب عمرو ما بيكره ولا عندك راي اخر
التحيه للشاعرة نضال حلوة النضم


لا أنا لا هي ..

هي سمعت قصيدة واستفزتها فردت عليها .. ..

وأنا عحبني الكلام .. ..

غايتو قالوا البحب ما بكره ..

ما فكرت اجرب الكراهية لمن احب وان شاء الله ما اكره بدا ..

سعيدة بمرورك العطر لا عدمناه ..

دمت ودامت مودتك ..

ودي ..
[/align]

التوقيع:
المحبة في الله سفينة مبحرة في بحر الإخاء
مرساها عند أبواب الجنة
يقول ابن القيم: ( إذا تقاربت القلوب فلا يضر
تباعد الأبدان ) 0000

التعديل الأخير تم بواسطة فاطمة التيجاني عبدالله ; 06-15-2012 الساعة 01:20 AM.
فاطمة التيجاني عبدالله غير متواجد حالياً   رد مع اقتباس
قديم 06-15-2012, 01:29 AM   #7
فاطمة التيجاني عبدالله
مشرفة منتدى الأدب والخواطر
 
الصورة الرمزية فاطمة التيجاني عبدالله
 

افتراضي

[align=center]2 ..



كنت دايره وكت اموت ترثيني انفاسك زفير
وانا كنت دايره الليل يمر ويشرق صباح باكر امير
و تجيني بي ضو الشمس شان يندفق الم الضمير
والقاك محمل اوكسجين ترجاني في النفس الاخير
بس موتي جواك كان اخير
كان اخير من لو اكون ناذراكا للافراح رفيق
كان اخير من وجعتي الكبت وساع السكه ضيق
مش كان اخير من جيتك يملا البحر لون الحريق
وانعل تفاصيل النفس لو حضرتك تعني الشهيق
واحضن ضلامي واقيف براي لكني مابرجاك بريق
واعطش واصد بحرك قفاي وانشاالله ماينبل ريق
شان موتي في جواك اخير
والله لو وروكا كيف انا كنت يوم القاك بكون
كان شلت اسمي مضيت عليو وبصمت انو ده اغلي كون
كنت استلفت من الزمن لحظات وحرشت العيون
تهواني لي حد العمي وتعشقني لي حد الجنون
بس موتي جواك كان اخير
شان يوم الا قيك كنت مابتعرف عيوني النوم يمين
و انا كنت جمبك بس بفكر تاني حا القاك متين
واناكنت شايله متاع سفر احزانو مامعروفه وين
ونهايتو لي آخر ثواني حياتي تتدفق حنين
لكن وحاتك ياقلب مسكين و واطاتك سراب
مسكين وماك عارف رؤي العشق البتعمي العين تساب
مسكين تلاقيك الهموم شقيش تفوت لوحه وكتاب
ترسم نهاياتك مدن تكتب علي جيتك غياب
الله اذا لحظة رحيلك مني تبكي المفردات
الله اذا يوم وجعتك تحزن جميع الكائنات
مابوعدك ارجاك امل وكتين يفوت فيك الفوات
بس بوعدك يوم رجعتك تلقي الحنين الفيني مات
وجنين غرامك قلبو مات
شان موتي جواك كان اخير[/align]

التوقيع:
المحبة في الله سفينة مبحرة في بحر الإخاء
مرساها عند أبواب الجنة
يقول ابن القيم: ( إذا تقاربت القلوب فلا يضر
تباعد الأبدان ) 0000
فاطمة التيجاني عبدالله غير متواجد حالياً   رد مع اقتباس
قديم 06-15-2012, 01:24 PM   #8
عثمان علي
نائب المدير العام
 

افتراضي

نضال الحاج بت مليانه ابداع . . تمتاز بالبساطة وأخذت من احاجي الحبوبات ونسمات الريف وكلمات القرى الحنينه وهذا ما جعلني ان ابحث دائما عن كلماتها فـ لها التحية و التقدير


هذا لقاء صحفي اجرته معها صحيفة الوان
نضال تخربش خوف الصمت (بالنضم) وتقف أمام المرايا

بهذه التفاصيل المغسولة بالبساطة ودعاش أرياف وموية المطر جاتنا نضال إلى ألوان ولونت بالشعر طعم (القعدة) وبهرجت المكان بلون الإلفة وريحة القلوة.. وبتلقائيتها المحببة اتونسنا معاها.. عن (أنا بكرهك) وعن قرية أم ريخا.. وعن طفولتها.. فاحالت سخانة الجو.. إلى غيمات شعر مبللة بالعامية ولغة الغبش ومع فناجين الجبنة.. (وهطت) لينا الكلام بمزااج.
{نضال حسن الحاج دي منو؟
-زولة بسيطة عريبية جزيرة ساي.. ولدت في أمدرمان الثورة الحارة العاشرة في سنة 1988م وبالمناسبة عيد ميلادها كان يوم 17/10 الفات دا.
{احتفلتي بعيد ميلادك؟
-بري ما احتفلت بيو.
{ قرايتك كانت في الجزيرة ولا أمدرمان؟
-قريت الابتدائي في الجزيرة اسلانج والصباحاب ومدرسة حمدان بن راشد وهسي حالياً بقرأ إعلام في جامعة السودان.
{ وصفي لينا حلتكم في الجزيرة عاملة كيف؟
-حلتنا اسمها (أبومريخة) حلة بسيطة مبنية من الطين وأنت خاشي عليها بتلقى الترعة والحواشات وبيوت البهائم وداك صوت ديك بعوعي في المغربية وفي نص الحلة تلقى البيارة والبنات شايلات جركانات ماشات إردن الموية.. وورود الموية دا طبعاً كان زمان هسي ما شاء الله الشبكة خشت البيوت.
{ أنت كنت بتوردي الموية؟
-وهو في بت عاشت في الجزيرة ما وردت الموية.. والله وردتها ورود.
{وأنت صغيرة ناس البيت كان بدقوك؟
-هو دق ساي.. بتذكر وأنا في الروضة في أستاذة الله إديها العافية كل يوم بسوقني معاها بيتم وبتأخر عندها أها كل يوم بدقوني في جنس التأخير دا.
{ لعبتي شنو في طفولتك؟
-لعبت كورعت.. واريكا عمية وبمبا ولعبات كتيييييرة.
{شكلك كنت شقيانة في طفولتك؟
-والله بالعكس مسكيييينة الغنماية تاكل عشاي لكن في حاجة لسه بتذكرها كنت بعضعض الشفع.
{نضال تربية حبوبات؟
-إياني تربية حبوبات.. كنت متعلقة شديد بحبوبتي حتى كان بسموني بت حبوبتها وبتذكر مرة كدا سرقت من محفظتها 200 جنيه. اصلها كانت مقرشة أي زول داخل عليها يغمد ليها حاجة.
{ما كلمتينا عن أبوك وأمك وأخوانك؟
-أبوي زول شيخ خلوة وأنا بشكر ربنا صباح ومساء إنو حسن الحاج أبوي.. وأمي مرة سودانية بمعنى الكلمة وعندي تلاتة أخوان وسبع أخوات.
{منو من أخوانك ديل بكتب شعر؟
-معتصم ومثاني.. ومثاني دي أصغر مني لكن والله العظيم لو مرقت لي برة أنا إلا أشوف لي شغلة غير الشعر دا.
{ ليه؟
-خطيييييييرة.
{أول قصيدة كتبتيها كانت متين وكيف؟
-أول قصيدة كتبتها كنت في خامسة ابتدائي وما كنت عارفة أنها قصيدة.. وهي زاتا كانت عندها مناسبة.. كنت بحضر في مسلسل (مايا) جات أمي قالت لي امشي غسلي العدة قمت من المسلسل وأنا ما رضيانة فقلت:
يا ربي يا ربي زيل عننا الكرب
احسن لي في مثواي بارك لي في دنياي
ارجوك يا ربي فلا تخيب رجاي
{الشعر عند نضال أكل عيش؟
-اطلاقاً.. بعدين ما في شعر بأكل عيش والشعراء ديل افلس ناس.. أنا شغالة صحفية في الأهرام اليوم.
{شنو يعني.. الصحفيين ديل الواحد اشتغل عشرات السنين عشان اقدر إعمل ليهو عمود أنت طوالي كدا عايزة تعملي عمود؟
-أنا ما بكتب عمود سياسي ولا اقتصادي عشان أكون محتاجة خبرة.. أنا بكتب خواطر.. شعر وبعدين ممكن نسميها زاوية ما عمود لانو العمود رأي وأنا ما بكتب رأي.
{ ليه الكره دا كلو في أنا بكرهك؟
-أنا اصلا القصيدة دي عملتها رد على قصيدة الشاعر معز عوض القاسم.. وكتبتها سنة 2006م وبالمناسبة دي أول قصيدة اكتبها وأنا اكون مبسوطة.
{يعني في شعر بتكتبيهو وأنت بتكوني ما مبسوطة؟
-أي قصيدة بعد ما انتهي منها بكون مبسوطة.
{طيب الشهرة دي كلها الجابا ليك شنو؟
-جابها لي حرامي.. عافية منو عافية ادخلو الجنة هي اصلا قصيدة (أنا بكرهك) كانت مسجلة في ذاكرة تلفون قام الحرامي دا سرق التلفون وسمع القصيدة ونشرها.
{الشهرك اكتر برنامج قهوتنا ولا أنا بكرهك؟
-أنا بكرهك شهرتني بالصوت لكن قهوتنا شهرتني صوت وصورة.
{نضال عندها قصيدة بتقول فيها:
قول للفلنتاين تعال
واتعلم الحب من نضال
دا بيعني أنك زولة بكاية؟
-قصدك حبيبة يعني.؟
{أي.
-أبداً.. ما بكاية.
{طيب أجمل قصيدة كتبتيها في الحب شنو؟
-بهواك أنا وبفرد عليك الريح غطا
وببراك بالدفو والأمان كان خربشك خوف الشتا
وببقالك العشم البلا تحراو همومك كلفتا
وشبع بنية وجعتك ذلة وإهانة وكفتا
بهواك أنا ومتيقنة الروح لي لقاك متمردة
وكضب البحدد ليك وطن وأنت المسامي محددا
ودا منو البقيسك في الحروف منو بي فراقك هددا
وأنت الفرشنالك دروب احساسنا شان تتوسدا
بهواك ونفسي محل تدق النوبة
شقيش الصباح اندس تمرق بالشمس
بهواك ونفسي محل تنابذني الظروف
احفر جواك وجعي وادس
وأنا نفسي في درس الصباح القاك
وفي طابور صغار الروضة في حصص الدرس
والقاك تنطط من قفا الدلوكة في بيت العرس.
{وبرضو تقول لي ما بكاية؟
-ما بكاية.


يتبع . . .


التعديل الأخير تم بواسطة عثمان علي ; 06-15-2012 الساعة 01:26 PM.
عثمان علي غير متواجد حالياً   رد مع اقتباس
قديم 06-15-2012, 01:25 PM   #9
عثمان علي
نائب المدير العام
 

افتراضي

[align=right]
{نضال بتبكي بدموعها متين وليه؟
-أنا ببكي بالدس.. وممكن اشوف لي مشهد مؤثر في مسلسل وأبكي معاو.. لكن اكتر حاجة بتبكيني في الواقع المشردين ديل.
ارتشفت من القهوة التي أمامها وسألناها بقولنا:
{أها قهوتنا كيف؟
-سمحة تب.. لكن ما زي قهوتي.. أنا أحسن مرة ممكن تعمل قهوة وأي مرة عندها شك التجي تنازلني على الكانون.
{بتعرفي تعوسي العصيدة؟
-هي بسم الله الرحمن الرحيم كيفن ما بعرف والله اتحدى ليك فيها اتخن مرة.
{يعني ما قاعدة تدردمي بيها؟
-بري يايابا هوي.
{أها وتاني بتعرفي تسوي شنو في المطبخ؟
-بعرف أعمل ملاح الويكاب وبحب التقلية وبتحدى بيها النسوان.
{ وما بتعرفي تسوي شنو؟
-ما بعرف أسوي البيتزا والفطائر.
{ كدي النخش في الغريق شوية كدا مواصفات فارس احلامك شنو؟
-زول ما افرض عليهو حاجاتي.. لتصمت قليلاً ثم تقول: يعني أنا احلم وأنت تكتب..
{ ظروف شغلك في الغالب مرتبطة بالبشرى.. زوجتو ما بتغير منك؟
-لا ..لا ..لا.. انحنا اصحاب شديد.
{طيب شنو المواقف الطريفة الجمعتك مع البشرى؟
-يعني عادي بنسمع من الناس في الشارع والله لايقين لي بعض شديد خلاص.
{الشهرة دي أكيد عندها مواقف كتييرة؟
-اسكت ساي.. في برنامج قهوتنا قدمنا حلقة عن التواضع وفي نفس اليوم في واحد كان ضارب لي اكتر من عشر مرات في وقت متأخر من الليل وأنا اصلا في الوقت دا ما برد على زول بعد شوية رسل لي رسالة كاتب فيها (قلت لي حلقتكم الليلة عن شنو).
{بقولو نضال اكتشفوها ناس صندوق دعم الطلاب؟
-ناس صندوق دعم الطلاب لقوني نجيضة لكن البداية الاولى والاكتشاف الحقيقي كان في إذاعة ود مدني وفي الوقت داك كنت لسه طالبة في الثانوي.
{راضية عن تجربتك في تقديم البرامج؟
-راضية.. لكن رضاي ما وصل درجة الكمال لسع..
{المتعة عندك في الكتابة الصحفية ولا قدام الكاميرا في التلفزيون؟
-متعتي الحقيقية إنو رسالتي تصل سواء كان في الجريدة أو التلفزيون.
{قصيدة كتبها البشرى واتمنيتي انها تكون حقتك؟
-السؤال ما كدا.. السؤال قصيدة بتلقي فيها روحك.. والإجابة قصيدة البشرى الاخيرة (الريدة في مراح الغنم).
{سافرتي برة السودان؟
-ما سافرت.. اصلو عوارضي فيهو كتيرة خلاص لكن جوة السودان سافرت كتير ما خليت بلد.
{اكتر حتة عجبتك وين؟
-كسلا.
{القصيدة بتطلع منك كيف ومتين؟
-القصيدة ممكن تجيني في أي لحظة.. وفي أي مكان بتذكر مرة كدا جاتني قصيدة ما كان جنبي ورقة عشان اكتبها فيها كتبتها في ورقة سجائر.. الشعر هو حالة من الارق في مرات وفي مرات تانية حالة من اللاوعي.
{نضال عندها انتماء سياسي؟
-تعرف أنا هسي لما أجي في الجامعة وامر على ركن نقاش بقعد ارجف كلي.. وأي زول يسألني عن حزبي بقول ليهو حزبي (نضال).
{وطبعا انتمائك الرياضي هلالابية؟
-هلالابية ما ناكراها.. لكن الفرق التانية كلها محل تقديري واحترامي.
{قلتي شنو في الهلال؟
-معليش ما حا اقدر أقول لانو ما معانا شاعر مريخابي عشان يجادعني.
{بتسمعي لي منو من الفنانين؟
-أول واحد مصطفى سيد أحمد وعثمان حسين ومحمود عبد العزيز.
{بتقري لي منو من الشعراء؟
-محيي الدين فارس وصلاح أحمد إبراهيم وروضة الحاج.
{عاملة كيف مع موضات اللبس والميكاج الجديدة دي؟
-أنا ما بحب المكياج وبلبس أي حاجة إلا البنطلون.
{في الحلة هناك صاحباتك منو؟
-صاحباتي شنو ما خلاص كلهن عرسوهن لكن عندي صاحبتي من بورتسودان مهندسة اسمها (ومضة).
{أنت هسي من هنا ماشة وين؟
-ماشة المطار.. مسافرة بورتسودان عشان اشارك في منتدى في جامعة البحر الاحمر.
{يوم حزين في حياة نضال؟
-يوم وفاة أختي الكبيرة الله ارحمها.
{ويوم سعيد؟
-الفرح ما برسخ عندي زي الحزن.
{نقدر نقول نضال بقت نجمة؟
-لو النجومية من الشهرة أنا نجمة.
{اختمي لينا بي حاجة عن الوطن؟


-إذا طهر العشق بقى ليك
وجب غسل الجسد بالضي
وإذا ضل المقيل عينيك
فرض تتوقى بي عيني
وإذا كان العلاج عندك
فمرحبتين حباب الكي
وإذا زرعك نبت في الجوف
شنو الما ببقى فوق الصي
فما قولك إذا سكن البكم صمتي
ومضغ حس الزمن حولك
وما قولك إذا سلب القصر طولي
وقفت أشابى لي طولك
وما قولك إذا صنقع خريف غيمك
نكت بطن الزمن غولك
وإذا دمي.. وأبوي وأمي.. وأنا وعمي
غتاي وبكاي.. هناي وشقاي.. هواي ودماي..
ناي وسواي.. صبح كل النضم هولك
فما قولك وطن مبدع.. وطن فنان
وطن بي قامة الإنسان
وطن كسر حدود الجوع
وعى وكان الفقر سكران
وطن إيمان.. فما قولك..
[/align]

عثمان علي غير متواجد حالياً   رد مع اقتباس
قديم 06-15-2012, 01:57 PM   #10
فاطمة التيجاني عبدالله
مشرفة منتدى الأدب والخواطر
 
الصورة الرمزية فاطمة التيجاني عبدالله
 

افتراضي

[align=center]أستاذي الراقي ..

يسلمو الأنامل ع جميل ما نقلت ..

ودي ..
[/align]

التوقيع:
المحبة في الله سفينة مبحرة في بحر الإخاء
مرساها عند أبواب الجنة
يقول ابن القيم: ( إذا تقاربت القلوب فلا يضر
تباعد الأبدان ) 0000
فاطمة التيجاني عبدالله غير متواجد حالياً   رد مع اقتباس
 
 
إضافة رد
 
 
الكلمات الدلالية (Tags)
مكتبة, الحاج, الشاعرة, حسن, نضال
 
 

« الموضوع السابق | الموضوع التالي »

الذين يشاهدون محتوى الموضوع الآن : 3 ( الأعضاء 0 والزوار 3)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 02:08 PM.


Powered by vBulletin® Version 3.8.8 Beta 2
Copyright ©2000 - 2014, vBulletin Solutions, Inc.
المشاركات والآراء المنشورة في منتديات جبل الأولياء | فردوس النيل الأبيض سواء كانت بأسماء حقيقية أو مستعارة تـمـثـل وجهة نظر كاتبها